September 3
Hminthang zet mi Pope lak ihsin pakhat a si ve mi Mithianghlim Gregory the Great cu kum 540 ah Rome khua ih Patricia sungkua ih suak mi a si. A kum 35 ih a hnatuan hmuahhmuah cu tan theh in siangbawi a rak cang.
Kum 590 ah Gregory cu Deacon a si lai ah mipi pawl ih dil nak in Pope ah an hril. A mah cu cuih khua ihsin tlan dingin a zuam nain St. Peter Biakinn ah an hruai ih hriak an culh.
Cui hnu in Gregory cu dungthluntu hnatuan cawl nawn lo in a tuan thok ih Doctoring Buaih a rak ngah. A mah cu tlawngta pawl run suak dingin le mifarah pawl bawm dingin pawlpi ih an ngah mi sumpai a rak hmang.
Rome khuapi a siat ral hnu Babilon miphun pawl ih kut sungin a minung pawl humhim dingah tuanvo a rak lak. Biaknak ah Gregory ih hla an rak hmang thok ih England ram ah Pathian hnatuan tu ding tampi a thlah. A mah cu Doctoring Buaih a ngah nain Pathian riantu pawl ih riantuan tu ka si tiah a mah le a mah a rak ti aw.
A mai ai run awh tu pawl khal in a si nak cu an run kilkhawi vivo. Nat nak tha lo pawl hlo dingah sualsir awk nak thawn khuasung an vel lai ah Hadriab Biakinn te tlun in Vancungmi Micheal in a naam te a suah lai an rak hmu.
Hi mi cu Bawipa ih cawhkuannak a cem nak thu a khih hmuh tin an ruat mi a si. Curuangah an lungawi thu hngilh lo nak ah cuih Biakinn pi par ah daar thawn tuah mi Vancungmi Micheal ih zuk an run ret.
Gregorian Missa ti kan thei theu mi cu Mithianghlim Gregory ihYatih pakhat thawn a rak thok a si. Cui Yatih cu Sualthlahnak Sacramentu ngah ta lo in a rak thih ruangah a thlarau hrangah Missa vei 30 nitin sumnak a rak tuah sak hnuah cui Yatih pakhat cu a nasazet mi sual cawhkuannak hell ramte in a rak luat thu a naupa hnenah langnak a rak hmuh.
Cui sin thokin Gregorian Mass a rak thawh nak a si. Mithianghlim Gregory cu a dam laiah Pope zung le thlarau lam thuthawn pehpar aw in tuah ding mi pawl ca uk 850 rori a rak nganthei a si.
A cangan mi cu “Pastoral care” tiah an run ko a si. Deacon a si lai ih England ram a um lai khalah a mai thusimnak le a thuzirh nak in England mipi tam zet Christian ah an rak lut tin a um nak mipi pawl in an sim a si.
Amah cu kum 604 March 12 ah a nunnak a cem ih September ni 03, 604 ah Mithianghlim sinak a rak ngah. Mithianghlim Gregory cu Leitlun san thuanthu ah a hminthangzet mi Pope pahnih lakah pakhat a rak si ve.
A mah cu kan thei zo bangin Pathian hrangah thinlung thatho zet le zuamzet in Pathian le Pawlpi hrangah hna a rak tuantu Mithianghlim a si nak in kan nihkhal a mah bangin Bawipai hrangah palai tha kan si ve thei nak dingah thla in cam sak aw tin thlaza cam tlang uh si.
