Archbishop Cardinal Charles Bo ih thuthangtha sim mi ah Catholic khrihfa pawl dinhmun ah huatnak, lehrulh sal duhnak le kaihhrem nak pawl pahsuah thei dingin le thudik thuhman, ngaithiamnak, remdaihnak le mai thinlung duh nak ihsin Khrih ih lamzin thlun dingah a rak forhfial a si.
Jer 20:7-9, Rom 12:1-2 le Mt 16:21-27 ta pawl kha hrambun in Bishop cun Pathian ih tongkam cu Khrihstian pakhat cio par ah le Pawlpi hrang lawngah si lo in buaibainak, kaihhremnak, umhmun suahsannak, farah harsatnak le awloksong nak pawl a tong rero tu kawl ram hrang khalah thupit in ka tong mi a si tin a rak sim.
Zumnak Meialh
Jer cathianghlim sung kha kan zoh a sile Cardinal in Jeremiah cu Pathian ih thudik thuhman a rak sim ruangah hnonnak, zawmtaihnak le harsatnak pawl a rak tong konan Pathian ih a rak hrilnak kha el a theih lo thu in rak hmuh a si. Jeremiah in Pathian ih tongkam cu “Ka thinlung sungih a alh mi meisa vek a si” tin a rak ti.
Cu thu cun zumnak ih thuthuk kha lang ter a si thu, Pathian ih duhdawtnak cu mipakhat ih thinlung a tong tikah a nih cu farah nak le harsatnak a tong tiang khal ah Pathian kha ol ten hnon theih a si lo thu Bishop Clarles Co in a rak sim a si.
Minungih ruahnak le Pathian ih tumtah
Cardinal Charles Bo in minung ih ruahnak le Pathian ih tumtah nak a danglam dan thu thupit in a rak sim. Jesuh cun Peter kha “Nang cu Pathian ih tumtah mi ruah lo in, minung ih tumtah mi pawl na ruah” tin a rak ti.
Khrihstian pawl nan mah ih ruahnak le na tumtah mi pawl kha Khrih a mah in a lo uk maw a silole leitlun ih ngaihsaknak pawl in a lo uk maw ti mi kha ruah aw sal dingin Bishop Charles Bo in a rak sawm a si.
Leilungpi in sinak, lehrulhsalnak, zuamawknak le kan ral pawl par ah neh nak in co ter thei ko nan Khrih lawngin tangdornak, ngaithiamnak, ral duhdawtnak le mitin ih sinak kha upat thiamnak cu pawl kha in zirh a si.
Paul ih ngan mi cathianghlim sungta kha hrambun in Cardinal in “Hi leitlun ih umdan kha thlun lo in thinlung thar thawn thleng aw uh” tin khrihfa pawl kha a rak forhfial a si.
Myanmar ram hrang ih Capi
Kawlram dinhmun kha zoh in Cardinal in a rei zo mi harsat tuarnak le kaihhremnak pawl ruangih a cangmi farah harsatnak pawl kha theih ter nak a rak tuah a si. Innsang tampi beidong vansang ih an um thu, mino pawl cu an hmailamcaan hrang ruahban lo ih an um thu, nauhak pawl ih fimzirhnak le tumtah mi pawl a siatsuah thu, minung pawlkom pawl kha an hlat sinsin thu le mi tampi cu an thinlung sungah a thuk zet mi hriamhma an phurh thu pawl a rak sim.
Remdaihnak cu tlaksamnak a silo, ngaidamnak cu sunnak a silo, a thar ih thok salnak cu a liam cia mi thu kha hngilh ter nak a si lo thu Bishop in hleice in a rak sim.
Cu aiin thar thok sal nak ti mi cu harsatnak pawl kha cingkeng in hmunkhat ten komkhawm in kan co dingmi hmailamcaan kha din suah dingih hrilnak a si.
Mino pawl hnenih kuat mi Capi
Cardinal in fimthiamnak, hnatuannak le hmailam hrang donhar le khuaruah har ih a um tu kawlram mino pawl kha thucahnak a rak nei a si. Mai tumtahnak pawl kha thlahphoih men lo dingin tha a rak pe a si.
“Kawlram ih hmailam caan kha huatnak thawn tundin a ngah lo” tin a rak sim. Cu aiin fimzirnak, thudik thuhman, ralthatnak, duhdawtnak le remdaihnak pawl in rampi thanso ter dingah mino pawl kha a rak forhfial.
“Remdaihnak ti mi cu mipakhat ih thok hmaisa ding mi thil a si lo. Cu mi cu mah hnenin a thok thei” tin a rak sim a si.
Thinglamtah le thohsalnak
Thinglamtah kha phur in a dungthlun dingah Bawipa Jesuh ih kawhnak kha ruat in Cardinal in tuicaan ah kawlram cun a tumzet mi thinglamtah a phurh thu theih ter a rak si ko nan thinglamtah cu a cemnak a si lo thu khrihfa pawl kha ralrin nak a rak pe a si.
“Thinglamtah ih dungah thohsalnak a um” tin a simih khrihtian pawl dinhmunin ruahsannak nei tu si ringring dingin tha a rak pek.
“kan biakinn pawl cu thlacamnak hmun lawng si lo in remdaihnak hmun ih a can a tul a si” tin arak sim. Khrihtian pawlkom dinhmun in rualrem lo nak hmun si ter lo in “Mai thinlung duhnak lilawn” siding ah a rak forhfial asi.
Kawlram hrangih thlacam
A cemnet nak ah Cardinal in khrihfa pawl kha leitlun daan aiin khrihih lamzin kha hril sawn dingin a rak forhfial. Huatawnak aiin thudik, lehrulhnak aiin ngaidamnak, tihphannak aiin zumnak, ruahsannak hloh ral aiin ruahsannak, lungrual lonak aiin rualremnak le kaihhremnak aiin remdaihnak pawl kha hril sawn ding a si.
Bishop cun kawlram hrangah hleice in thla a rak cam sak hnuah mipi pawl ih hriamhma pawl kha thuamhluam sakding, beidong vansang ih a um tu innsang pawl kha hnemnak pek ding, umhmun a suah san tu pawl kha huhim ding, mino pawl thazaang pek ding, hotu pawl kha theihthiamnak le zangfah lainat nak pe ding le hriamhrei kai tu pawl ih thinlung thleng ter dingah Pathian hnen thla a rak cam.
“Meithal awn pawl cemral ter aw. Huatawknak pawl khal dai ter aw” tin thla a cam phah ah kawl ram mipi ih “harsat zonzaih tuar nak aw thawm pawl aiin remdaihnak awnmawi” kan theih thei nak dingin thla a rak cam.
Pawlpi cu lungrualnak le tharthoh salnak le kawlram pi cu huatawknak aiin duhdawtnak, kaihhremnak aiin remdaihnak, lungrual lonak aiin lungrualnak, ruahsannak hloh aiin ruahsannak thawn khat mi rampi a cang thei nak dingin tin Cardinal Clarles Bo in a thla camnak a rak cem ter.
“Bawipa Jesuh Khrih, kan thinlung in thleng ter hram aw. Ram mipi pawl kha in humhim sak aw. Kawlram pi kha remdaihnak lamah hruai hram aw” tin thla a rak cam asi.
Credit- RVA Myanmar Service
