Pope Leo in Catholic pehtlaihawknak hnatuan tu pawl hnenah  thudik hawlsuak ding le milai an sinak upat thiam in thazang a cak ter tu Digital thilri le a hman ding dan pawl kha thangso ter ding in a dil. Himi a dilnak ca cu a tu Kigali, Rwanda ih an tuah rero lai mi leitlun huap SIGNIS khawmpi ih a ratu pawl hnen ah a kuat mi a si. Cui ca cu a mai ai-awh in Cardinal Parolin in a hmin a khen mi a si.

Pope cun pehtlaihawknak thu an relkhawmnak in misen pi hrang ah thathnemnak “thazang thar” a suah ter ding tin zumnak ka nei tin a sim. 

Nunphung le ruahnak hmuihmel tuahsuak

Digital san ih thil cang mi pawl vun zoh tik ah, santhar nunak tam sawn cu internet le digital cet thiamnak lam in in kaihruai tin a sim.  Cun Pope Leo in “Magnifica Humanitas” sung ih a ngan mi vun ruat in, online pehtlaihawknak cu thuthang theihternak men si lo in, nunphung khal a sersuak ih, minung pawl ih leitlun an hmuh dan le an ruahdan khal a hngetkhoh ter a si tin a ti.

Himi thuhla ah Pope Leo cun khawmpi ih a ra tel tu pawl kha an thulu tar mi “Nunphung remdaihnak le kiangkap thatnak hrang Digital petlaihawknak” ti mi kha thaten zir ding le hmangthiam ding in thazang a pek.

Komawknak, remdaihnak le sersiam mi pawl kilkhawi

Cutivek lamzin cun lungrualnak le remdaihnak ih man a neih dan zia langter thei tu nunphung pakhat cangsuak thei ding in a bawm thei ih, kiangkap kilkhawi thei nak ding tuanvo khal a cak ter thei tin Pope Leo in a sim.

Pope Leo in pumkhawmnak ih a tel tu pawl ih an hnatuan mi hi kumkhua in rah a rah thei nak ding ah tin Pawlpi ih Nu a si mi Nu Mary hnen ah ap in thla a cam sak hnu ah, “ Bawipa ah fimnak le cahnak” hmu ding in tin thluasuah a pek.

Himi thuthang cu Vatican news in kan don mi a si.