Synodal Thlarau Thazaang

July 28, 2026

• Thiang Thlarau le Bibal Cathianghlim
• Synodal Kawhhran kan timi ih thlarau thazaang hi Thiang Thlarau hnen ihsin a ra mi a si. Cui thlarau thazaang ngah thei dingin Pathian ih tongkam ngai a ttul. Baibal cathiang hlim siar le ngai a ttul tikah a si. Cun Baibal siar le ngai menmen cu a thawk hrih lo. Thlarau thazaang ngah ding ahcun kan siar mi Baibal cu daiten ruah a ttul. Cui tlun ah thinlung rori thleng a ttul. 
• Thiang Thlarau ih thupit dan thawn pehpar aw in Pope Fancis in, Thiang Thlarau cu a rin umbikmi kanmah lamzin in hruai tu a si; curuangah Thiang Thlarau ih aw thei thiam dingin a pakhatnak ih kan zuam a ttul a si. Ziangah tile Thiang Thlarau in milai hnen ihsin siseh, thil hmuahhmuah hnen ih siseh a ttong a si, a ti. 

• Cun thlarau thazaang ngah thei dingih a ttul hrih mi cu Thiang Thlaraui h bomnak in tangdornak, thinsaunak, mi ngaithiam duhnak thinlung neih a ttul timi a si. Ziangruangah tile milai cu mah pakhat lawng tthanso a theih lo. Pakhat le pakhat a si lolen pawlkom pakhat le pakhat bomawk a ttul a si. Mithiang Paul ih in sim bangin 1 Cor 12 sungih in sim bangin Thiang Thlarau ih phun dangdang laksawng in pek mi cu cohlan sakawk ding a thu pi.

• Tihnimnak sacrament kan ngahnak in kan zaten pakhat le pakhat kilkawi awkding le bomawk dingin ttuanvo kan nei ciau. Curuangah Kawhhran sungah siseh pakhat le pakhat karlak ah siseh thil tuahsual mi pawl hrangah ngaithiam awknak, remawknak, le rinsannak um thei sal dingih zuam a ttul. Himi hi tui synodal kawhhran kan timi in thupi zet ih a feh pi mi a si.

•  Missa Sumnak le Khrih hmin ih tonkawmawknak

Jesu Khrih in Matthai 18:20 sungah hitin thu in kam: [“Ziangah tile kan hmin in mi pahnih siseh, pathum siseh, nan pumkhawm tikah nan hnenah ka um ve a si,” tiah a ti. Hi in thukam mi hi hmun hnih ah a rung cang suak. (1)nak cu Missa sumnak kan tuah tinten Bawi Jesu cu kan hnenah a um a si. Cun (2)nak cu a mai hmin ih kan pumkhawm awk tikah a si, tahtthimnak ah synodal meeting kan tuah tikah a si.

• Missa sumnak kan tuah tikah Pathian Ttongkam kan kan ngai.
• Cun synodal pumkawmnak khal ah cui Pathian Ttongkam thotho cu kan ngai. Pathian in kan thinlung sungah ziang thu in sim ih nitin kan nunnak ah ziangtin kan ttuansuak ding a si timi ruahkawmnak kan tuah.
• Curuangah Missa sumnak le synodal pumkhawmnak hi ziangtluk tiang in pehzom awknak an nei ti kan thei fiang a si ahcun nitin kan nunnak Pathian hna tthaten kan ttuan thei sinsing ding a si.

Curuangah, Zumtu u le nau,

            Synodal Church ih in sawmvek in

• Thiang Thlarua hnenah thlacam sinsing uh si,
• Baibal cathianghlim siar in Pathian Ttongkam ngai sinsin uh,
• Missa sumnak le Jesui hmin ih pumkhawmnak ah tel thei dingin zuam sin uh si.

Thlarau Thianghlim in nan ttul sam mi laksawng lo pe hram seh. Amen.

Thuthangtha Simtu -Rev. Fr. Lucas Tha Ling Sum