Khuahlanlaiah caw hnawi zuar tu nunau pakhat cu Cawpi pakhat a zua. Nitin deuh in dawr ah cawihnawi a zuar theu. A ngah mi paisa ten a ei in ding a lei.

 Nikhat cu cui nunau nu cu dawr ah cawihnawi zuar sal dingin a cawihnawi bel te cu a lupar ah toh in a feh. Cui ni cu inn ihsin a pok khal a tuan ih nuam teten a feh.

A lu par ih cawhnawi bel te cu kai phah in hi mi ka zuar theh in ka ngah mi paisa te thawn ziang mi ka tuah pei tin a mah ten thu a ruat ciamco.

“Aw… ka ngah mi paisa in inn dung ih leilung a lawng nak ah arfa te zakhat hrang ka lei ding ih ka zua ding tin a ruat. An tum in dawr ah ka zuar lala ding ih paisa tampi ka ngah ding” tin a ruat phah ih a feh vivo.

“Cui rei lo te ah Caw pakhat ka lei lala ding cutin cawhnawi tampin ka zuar lala dingih paisa tampi ka ngah lala ding tin a ruat ih a lungawi tuk ih a hmailam ih lungto kha a hmu lo ih a pal ngah, Cu tin a pah ih a cawihnawi bel khal a kuai ih a bung theh asi.

Cutin cu nu khal thu a ruat thei nawn lo. Beidong zet in leilung ah ato ih a tap. “Ka thuruah a nuam lai ah tuisun cu paisa fangkhat hman ka ngah nawn lo ding ei in lei nak ding khal ka nei nawn lo” tin tap phah in a tong ciamco.

“Arti a kuai hlan ah a fate paziat a keuh tin siar cia hlah” ti mi tong fim ah a um. A ra thleng hrih lo thil ruah nak cun tu ti mi caan kha a siat ral ter thei asi.

Thuruah nak ti mi ngaingai tuah nak asi lo. Tumram ti mi cu tuah nak thawn lang ter ding asi.

Dinhmun le caan par ah hngat aw in tuah ding a si. Fehphah ah ruah le cawihnawi bel kuai lawng a ngah ding asi. Tu ih tuah rero lai mi hna par ah thinlung zaten ret ding. Ruah nak khi lam thleng thul hi lam thleng thul asi le cu tuah rero lai mi thil kha tuah suak thei lo ding asi.

Thuanthu sung ih cawhnawi zuar tu nunau nu kha ngaingai cun a kut sung ih paisa a ngah hnu lawng ah thu kha ruat ding asi. Thil pakhat khat a cang ngaingai hlan ah ruah nak thawn hlan khan in nuam aw hlah aw ruat cia hlah aw.

Hmailam hrang ah ruat ciamco ti mi le hmailam hrang ih timtuah cia ti mi an bang aw lo. Ruat timi cu a fiang lo mi thil asi ih timtuah cia ti mi cu a cang thei lai mi kha timtuah ih ngaingai ih tuah suak ding kha si.

Voikhat voihnih ah thil pakhat khat ruangah kan ruah ban lo mi thil pawl kan sung can khal a um. Cu vek caan ah a hlan ih kan ruah cia mi thil kha kan thleng a tul caan khal a um.

Ruat nak men ti mi cu ruahsan nak hnak in a hlat sawn. Ziang vek thil a si khal le a cang hlan ah hlatpi tiang ruat cia hlah ruah nak a sual thei.

Credit :