1. Pallium ti mi cu, Metropolitan Archbishops (Cardinal) le Latin patriarch of Jerusalem pawl lawng ih hruk thei mi a thiang mi hngawngawrh a si.  Cule hi mi hngawngawrh cu tuuhmul rang thawn tuahmi pat lawng hi hman a si. A duhsan cu Pope thawn naihawzet in Pathian hnatuan(Tuukhal sinak) nak ah a tul vekin thuneih (ukthei) nak tawmaw tahratin le rualrem ten komkhawm aw ih hnatuan thei ding ah tuanvo neitu na si ti langter nak a si. Cun tuukhal pa in a tuu pawl a liang ah a put ih inn ah a tlunpi vekin nang khal tuuhlo pawl thaten kilkhawi ding ih tuanvo pek na si ti nak a si.

2. Zo pawl in hi hngawngawrh an ngah thei ?

• Archdiocese ho/uk tu bishop pawl lawng hi an si. Tahtim nak ah kan kawlram hrangah cun, Mandalay, Taunggyi, Yangon ih bishop pawl in an ngah thei. A hleice in Cardinal hi a si.
• Latin patriarch of Jerusalem: Holy land ih Latin-rite a hmang mi Catholic pawlpi ho tu Bishop hi an si.

3. Ziang tik caan ah pek an si?

• St. Peter le St. Paul ih puai June 29 ni ah Vatican ih St. Peter basilica biakinn pi ah Missa sumnak sung ah cu mi hngawngawrh cu Pope ih thluahsuah pek nak thawn sunglawi zet in peknak an tuah.
• Hlan lai daan : Archbishop hrilthar mi pawl hmuahhmuah  Rome ah Pope tong ding ih an feh  lai caan ah pek a si theu.