Gospel (Mt 10:37-42), sung ta thawn pehpar aw in a sim mi cu; Pathian ih dungthluntu/ a hnatuantu si dingah a tul mi le a mah Pathian  kha duhdawtnak thinlung tak in  komthei tu si dingah kan nunnak zaten kan ap ding hi a tul bik mi a si.

Duhdawtnak ti mi cun  pehparawk lonak, sunralnak,  khualthasinak timi pawl hi a tul. Khrih ih in pek mi duhdawtnak thawng in pakhat le pakhat pehpar aw lo ding ih kan um thei mi in, kan pehtlaihawk nak kha famkim in a lang ter sawn a si. Innsang dinhmun hi vunzoh hman uh, innsang thar thaten dinthei ding ah a nu le pa ih inn a tanta lawng ah thaten a din thei.  Curuangah, nu le pa pawl in fate kha “an mai kepar ah dingthei dingin” le lungawi ten nungthei dingin le famkimnak hawlthei dingin nan zirh ding kha a thupi tuk tin a sim. 

Duhdawtnak  ih a thupi zet mi thil pakhat  cu sunralnak hi a si tiah Pope in a sim. “Mi pakhat hrang ah hmunram (khan) kan tuah thei nak dingah, rualpi pakhat ih thungai sak thei ding in kan caan malte pethei dingah le harsatnak caan ah hnemnak pe thei dingin  mai nomnak sup thei dingin tiih duhsak nak thinlung kan neih lawngah cui DUHDAWTNAK CU rah a rah ding” tin Pope Leo in a ti.

Cun Pope Leo in, mikhual zohthat thei hi laksawng pakhat a si ve, duhdawtnak lang ter dingah kan nun ih kan neihtul zet mi khal a si tiah a ti.  “Duhdawtnak cu duhhrilnak le cangvaihnak diktak hmangin a lang, ziang vek ha a si ti le nitin ih tuahmi thil fate ti halmi  pakhat tidai khuatkhat te va pek mi” khan a lang ter a si.

“Jesu hmin in a ra mi pawl kan hmuak/cohlang tikah a mah le amah thlahtu vancung ih a Pa kha kan hmuak  a si.” “Thutak in, kan unau pawl kha thaten kan zoh/hmuak thei ringring a si ah cun Bawipa kanduhdawt tinak kha a lang a si.”