Japan ram ih Mintami Nobuko
Mintami (မင်းသမီး) (Princess) Nobuko cu Japan Imperial ( Siangpahrang sungkua) thuan thu ah a hmaisabik Catholic biaknak ah Baptism a latu a si. 2025 kum September 30ah Catholic biaknak a si mi Aso sungkua in a rak suakih a thanglian tu Princess Nobuko cu Japan Siangpahrang sungkua sungih a thar din mi a dang inn pakhat ih uktu dinhmun in official in tuanvo la tu a si. Hi mi ruangah a mah cu a mai budget, a mai inn le mipi thawn pehpar aw mi thu neihnak a nei mi a dangte ih Siangpahrang inn kha a hoha thlang ding. Cu mi cu 1990 hnu Japan Siangpahrang sungkua sungin a thar din mi inn pakhat hoha dingah tuanvo a rak la.
Kum zabi tampi a rei hnuah Japan uktu pawl cu Catholic zumnak kha an mai ram ih hlo dingah an rak zuam. Tokugawa Shogunate sanah Christian biaknak cu thah dingin thu pek theinak dinhmun tiang a rak cang.
Pathian hnatuan pawl le zumnak hrangih nunnak a rak pe tu pawl kha thinglamtah ah an rak that ih Christian aiawh hminsinnak pawl khal an rak khamih zumtu pawl kha kum 250 luan a thup in an zumnak an nunpi ih an rak hmang. Thu neitu pawl in Christian biaknak cu Japan ram in a cem tiang kan do thei ngah tiah an rak ruat. Asinan an rak ti suak thei lo.
Tuicaan ah Catholic ah Baptism a sang tu mintami pakhat cu Japan Siangpahrang sungkua sungah a rak cang. Hlanlai ih Christian pawl a rak hremtu thuneihnak a pehpeh cu a tu ah cun Catholic zumtu pakhat a telnak cu zumnak ih a khohkhahnak kha a langsar mi thuanthu ih tel mi tetti pakhat a si.
Princess Nobuko Aso ih thuanthu tawi.
Princess Nobuko of Mikasa cu 1955 kum April 9 ah Japan ram ah a rak suak ih Catholic Aso sungkua in a si. A upa cu Japan vuanzichuk hlun Tara Aso a si.
1980 kum ah Prince Tomohito of Mikasa thawn kutsihnak an rak nei ih Japan Siangpahrang sungkua ah a rak cang. An mah in fanu pahnih an neih ih an hmin cu Princess Akiko of Mikasa le Princess Yoko of Mikasa an si.
Amah cu a tu ah Japan Siangpahrang sungkua sungah Baptism a sangtu a si tiah mi theih tam a si ih Catholic zumtu pawl humhim tu Siangpahrang sungtel pakhat dinhmun in mi ih theih nak a ngah zet tu a si.
2025 kum ah Japan Siangpahrang sungkua sungah a dang innthar pakhat an dinnak ah amah in upa dinhmun in tuanvo a lak ih 1990 kum hnu lamah a hmaisabik din mi Siangpahrang inn thar a si. Japan ih Catholic zumtu pawl hrangah a mai nun ram cu Japan ram ih Christian pawl nasa zet ih an hremnak thuanthu karlak ah zumnak ih hnget zia kha hngilh lonak pakhat a si tiah an rak hmu.
