Catholic zumtu pakhat in nikhat ah Holy Communion ( Bawipai thi le sa) vei ziat a sang thei?
RVAFalamService. June, 13, 2026.
Mitampi in an thei lo nan Pawlpi ih daan cu hi mi thuthawn pehpar in a fiangzet ko.
- Canon Law kan ti mi Pawlpi daan hrampi in ziangtin a sim.
Canon no. 917 ah hi tin a langter.
Bawipa thi le sa a sangzo tu mipakhat cu cui ni thotho ah a veihnihnak a sang thei a si. Asinan Eucharistic Celebration (Missa raithawinakah) kim ten a thokin a cem tianga tel a tul.
Hi mi ah sangsal ti mi ttongfang cu “neta veikhat lawng” tiah duhsan a nei a si. Curuangah a ngaingai ah cun
- Missa sumnak veikhat ah Bawipai thi le sa san cu on a si.
- A veihnihnak Missa sumnak khalah Missa sungah a thok in a net tiang tel tikah cohlan thei a si.
- A sinan a veithumnak lole veilinak cu san a ngah nawn lo.
Pawlpi in Bawipai thi le sa kha nikhat sungah tampi san deuhdeuh le thlawhsuah a tam deuh ti mi ruahnak kha a cohlang lo.
2.Pawlpi in a malbik ziangtuah dingah a dil?
Pawlpi ih a hrampi tuanvo vekin Catholic mi pakhat cu Easter season (thosal tik cu caan) ah a malbik veikhat a san a tul. Asinan Pawlpi in
- Zarhpi ni tinten
- Zarhkhat sung nitin cohlang dingah a forh a si.
3. Puithiam pawl in the veiziat an ei thei?
Hi mi hi tuletu thei daan a palh theu. Conon 905 ah
- A daanah cun Puithiam pakhat cu nikhat ah Missa veikhal lawng tuah theinak an nei.
- Asinan Zarhpi ni, Christmas lole Pawlpi ih tulsamnak pawl (Puithiam daihawk lonak) ruangah Bishop pawl ih thupeknak thawn vei 2 (Bination) veithumnak (trination) tiang tuah thei a si.
Puithiam cu Missa sumnak a tuah tinten Bawipa thi le sa ei a tul. Cui mi cu hrial a thei lo. Ziangahtile Puithiam cu Missa raithawinak a tuahnakah Khrih ih aiawh tu (in persona Christi) dinhmun in a tuah ruangah a si.
Curuangah Missa veikhat a tuah le veikhat a sang dingih veihnih a tuah le veihnih, veithum a tuah le veithum a cohlang a tul a si.
Canon 917 ah Missa sumnak a tuah tu Puithiam pawl hrangah zianghman a pheh par aw lo.
4. Alter Servers (Pulpit ih Puithiam bawmtu pawl) hrangah ziangtin a si pei?
Alter Servers pawl cu zumtu mi menmen an si ruangah a dang Catholic pawl thawn a bangaw mi daan an thlun a tul asi.
Nikhat ah Bawipai thi le sa veihnih cohlan thei a si.
Aveihnihnak cu Missa tuahnak sungah a tel a tul thotho.
Missa raithawinak ah Altar Server dinhmun in a tuantu pawl khal Communion kha veihnih hnak ih tam cohlan a ngah lo asi.
Missa sumnakih bawmtu pawl a tamdeuh in an tel khal le Bawipai thi le sa nikhat ah veitam pi sang dingah daan in a duh lo asi.
Atawizawng ih kan ti a sile
Nikhat ah a tambik Bawipai thi le sa veihnih lawng san theih a si.
A veihnih nak sannak khal cu Missa a thokin a cemtiang a tel lawngah a sang thei asi.
Puithiam pawl Missa an tuah tinten Bawipa thi le sa an ei ih an cohlan a tul.
Missa an tuah daan ih zir in veikhat an tuah le veikhat, veihnih an tuah le veihnih cohlan thei a si.
Himi pawl cu Catholic Pawlpi ih Canon Law ih tidaan vek in Puithiam pawl cu Holy Communion cohlan nak thawn pehpar in veikhat, veihnih, veithum tiang an cohlan thei a si.
