June 10
A ral tha zet mi mithianghlim Olivia cu AD 448 ah Italy ram Palermo khua kiangih milian sungkua in a rak suak. A kum 13 ah tleirawl thok a si mi Olivia cu a mawi tuk ruangah a hmin a thang nan a nunram hmuahhmuah kha Pathian hnen lawngih a pek duh thu, a neih mi thilri hmuahhmuah khal mifarah pawl a bawm ih a athianghlim mi nunram thawn a um duh thu kha a phuang.
Cui tikcu caan ah nisuahnak lam Jumani Vandal miphun pawl in ram an rak nor ih Vandal siangpahrang in Pamula khua kha an long ih Khristian mi tampi cu thah an tuar.
Cui hnuah Olivia cu Africa saklam ih a um mi Tunis khua ah kaihrem nak a rak tong. A mah a kai tu pawl hnen in tlansuak dingih a zuam phahah kai a tuartu khristian thawngtla pawl ih zumnak kha fek sinsin dingin tha a pek hnuah ruahdaan dang tu thawngtla pawl khal Catholic pawlpi kha an zum thei nak dingin mangbangza pawl thawn a rak tuah thei.
A thang zet mi a thuhla pawl ruangah fala thianghlim Olivia cu khua upa pakhat in an khua ihsin a dawi hnuah sahrang pawlih deh thah dingah khua upa cun a ruat nan sadawi tu pawl in nundam lai ih a um kha an hmuh tikah a thok nak ah cun sadawi tu pawl in that lo nak tuah dingin an ruat nan Olivia cun sadawi tu pawl ih ruat nak a kham thei lawng si lo in an thinlung tla a thlen ter thei.
Sadawi tu pawl in Olivia cu khuapi thawn a hlat nak hmun ih an hruai hnuah an mai nunphung lak in a um tu Olivia cu ruah nak dang ih a nun tu pawl ih nunram kha a thlen ter thei.
Hi thu cu khua upa in a theih tikah Olivia kha neta thah a tum sal. Olivia kha an kai ih thawng ah an thlak ih khuasia khuavang pawl na biak a si le kan lo thlah ding tin an rak forhfial.
Olivia in a ngai lo ih hrihrual thawn an vuak ih an hrem. A hnipuan pawl an phoih sak thluh ih siti so pi sungah an thlak. Asinan a ruang cu a siat lo vekin a zum nak khal a hnget khoh lai.
Cui hnuah a nih cu nungcing in meisa ih uar kang that dingin thuthen nak an tuah nan cumi khal a nung lai thotho ruangah a tha hnem lo.
Netabikah cun a lu an tan sak lawngah a nun nak a rak cem. AD 463 kumah a nun nak a rak cem a si. A nih cu awn mawi tum tu pawl ih rinsan zetmi mithianghlim a si. Ziangruangah tile a mah cu hlasa le hlangan peih zet tu a si ruangah a si.
Olivia ti mi hmin cu Latin tong in a si le Olive kung a si lole a tek tin san a neih vekin remdaih nak, thlarau rah, kuntikkha le mawinak pawl ih hminsin nak khal a si.
