Pope Leo in Algeria ih a fehnak vanzam parah “ kei cu ramkhel ah riantuantu ka si lo, Gospel Thuthangtha thu lawng ka sim” tiah sim. (April 13, 2026)
Pope Leo in Algeria a fehnak vanzam par ah Donald Trump ih tubaite ih a sim mi pawl thu an suh tikah “kei cu ramkhel tuantu ka si lo” tiah a rak sim. Cuihnu ah ralbuainak dodal in remdaih hrang thurel tlangnak khaisang dingah pehbet in tamdeuh in ka sim ding tiah a rak sim.
Algeria a fehnak vanzam sungah Pope in tuah daan kel vekin thuthang latu pawl ih thusuhnak a rak sang. Cu mi sungah Donald Trump in Truth Social parah a rak sim mi ttong pawl kha an rak suhnak thu pawl khal a tel.
Pope Leo XIV in “ka tuanvo cu ramkhel hnatuan tu pakhat ih tuanvo dinhmun a si tin ka hmuh lo. Kei cu remkhel tuahtu khal ka si lo, a mah thawn khal in elawk duhnak khal ka nei lo tiah thupit in a rak sim.
Pope in pehbet in “mihrek khat pawl ih tuah mi vekin Gospel thuthangtha kha a hman lo zawngih hman ka duh lo. Kei cu ralbuainak kha ka doral ih remdaihnak kha thurel tlangnak thawn ram khat le ram khat karlak ah tuahtlangih khaisannak kha napin ka sim peh ding. Tui ni minung tampi harsat mangbangnak an tuar ih sualnei lo minung pawl tampi in an nunnak an liam. Curuangah a tha deuh mi lamzin tidaan a um thu pakhat khat ih sim dingah a tul tiah ka zum” tin a rak sim.
Cuihnu ah Pope in a mai Pope a tuan thoknak ih a rak sim mi kha a sim sal. Cu mi cu remdaihnak thu a si. “Hi mi ttongfang cu Trump pakhat lawng silo in leitlun hmuntin ih ramuk tu pawl zaten ka sim mi a si. raldonak pawl cawl in remdaihnak thawn rualrem sal nak kha khaisang uh si” tiah a rak sim.
America thuthang latu pakhat ih a suh bet tikah Pope in “kei cu Donald Trump uknak ka tih lo. Hi mi cu ka sim mi cu kei mai tuah ding mi hnatuan tin ka zum ih Pawlpi ih hnatuan khal a si” tiah a rak sim.
Kei cu ramkhel ih hnatuan tu ka si lo” tiah a rak sim. “Ramkhel lam ih daan pawl khal an thei vekin an tuan ciar lo. Asinan kei cu remdaihnak kha dintu dinhmun in Gospel thuthangtha kha ka zum tiah a rak sim.
America Bishop pawl ih simnak,
Archbishop Paul Coakley in President ih ttong pawl ruangah “an thin nuam lo thu a sim. A nih in Pope Leo XIV cu ralvekin hmu lo sehla a tha, Pope cu ramkhal tuah tu khal a si lo tiah a sim.
Bishop in “Pope cu Khrih ih aiawhtu a si ih Gospel thuthang ih thu dik simtu, minung pawl ih thlarau lam kilkhawitu asi” tiah Bishop in a rak sim.
Africa ram a fehnak ah lamhmuhnak thupi bik thuhla cu remdaihnak asi. Pope Leo XIV in hi khualtlawnnak cu thuhla tampi ruangah a danglam hleice tiah a sim ih, hi mi cu “a mai Pope dinhmun in a hmaisabik a Tuukhal khualtlawnnak si dingah a rak tumtah mi khal asi tiah a sim.
Saint Augustine of Hippo ih suahnak ram ka feh thei ruangah ka lungawi tiah a rak sim. Hi mi mithianghlim cu biaknak tin kim thurel tlangnakah a thupi mi “Lilawn” pakhat vek in hna a tuan tiah a rak sim. Hi saklam Africa ram ih bishop dinhmun in rian a rak tuan dahnak hmun fehnak cu Pope hrangah thlawsuah pakhat a sivekin Pawlpi le Leitlun pi hrang khal ah thlawsuah pakhat asi tiah a rak sim. A thu cu remdaihnak le lungrualnak kha din in “Lilawn pawl” kha hawl ringring ding asi tiah a rak sim.
Pope in thuthang latu pawl a netnak ih a simnakah hi a Tuukhal khual tlawnnak ih a thupi bik ih a duhsan kha a rak sim. A bangaw mi aw, a bangaw mi thuthang cu a feh vivo ding. Kan ni cu remdaihnak, rualremsalnak thawn khat le khat upat awk nak kha ka khaisang duh” tiah a rak sim.
Pope ih to mi vanzam cu Algeria ram ih khualipi Algiers ah a tum ih Pope Leo XIV cu President Abdelmadjid Tebboune in caanserh thawn hlunghlai zetin a rak hmuak.
Adang ten an tonawk hnuah Pope cu Algeria ih nithum rei a Tuukhal khual tlawnnak ih a hmaisa bik cawlnak Maqam Echahid ah a feh. Hi mi thuthang cu Vatican thuthangin a tawizawngin kan ngan mi si.
