Pope Leo in Iran mipi pawl hrinhroak cu ziangtizawng khal in a can thei lo sim.(April 7, 2026)
Castel Gandolfo ah thuthangla tu pawl hnen Pope in a simnakah “thinlungtha neitu pawl hnenah ziangtik lai caan khal ah remdaihnak hawl dingah le ralbuainak hrial dingah” a rak forhfial. Cuihleiah remdaihnak thawn pehpar mi tidaan hawl dingah thureltlangnak cabuai ah kir dingah a rak sawm ih minung umnak inn pawl siatsuah in donak cu international thawn pehpar mi daan thawn a kalhawk thu khal a rak sim.
“Remdaihnak kha hawl in raldonak hrial uh.” Hi mi thu cu tlawngkai nihnih ni zanlam Castel Gandolfo ih Villa Barberini lenglam ah a mah a rak hngak tu thuthang la tu pawl kha Pope in dimten ralrinnak a rak pek.
American le Isreal in Iran an do hnuah American President khal in Tlawngkai nihnih ni zan lam ah “Laitek mi tikcu caan sungah lungkimnak an tuah thei lole Iran siatsuah theh asi ding” tiah a rak hringhro. Hiti vek dinhmun ah Pope in Zarhpi ni ih Urbi et Orbi pe dingih thu arak sim lai ih a sim mi kha a rak sim sal. Pope in thinlung thaneitu pawl in remdaihnak kha an hawlih tuahmawhnak silo in remdaihnak kha hril in ralbuainak hrial dingah a hleice in minung pawl in a dik lo tiah an sim ih pehbet in a kauih a nasa deuhdeuh ih zianghman ih rem thei lo mi ralbuainak kha cang lo dingah a rak dil.
Pope in hi buainak ih a cang mi pawl khal ziang rel lo in um lo dingah thupit in a rak sim. Kanmah pawl cu leitlun thawn pehpar mi sumdawnnak harsatnak, cet lam ih harsatnak pawl le nisuahnak a laifannak ih a him lo mi dinhmun kha an tuar ih cui dinhmun cu leitlun pi zate ah huatawknak pawl tamdeuh a can ter a si” tiah a rak sim.
Cuiruangah Pope in thurel tlangnak cabuai ah kirsal uh si. reltlang uh si. A remrual mi ti daan in thutawl rel tlang uh si” tiah a rak forhfial. Cuitlunah buainak sungah diklo in a tuartu minung zate khal mang in a rak sim.
Ahleice in sualneilo nauhak pawl, kum upa pawl, natnak tuartu pawl le ralbuainak ruangih a cang mi ruangah siatsuah tuartu pawl zaten mangsal uh si. Cuihlei ah minung umnak inn pawl siatsuahnak cu international daan thawn a kalhawk thu ralrinnak a rak pe. Hi tivekih tuahnak cu minung pawl ah a um thei mi huatawknak, thleidannak le siatsuah duhnak thinlung pawlih tidaan a sithu khal a langter” tiah a sim.
Pope in “kanmah pawl zaten remdaihnak hrangah tuah duhnak an nei ih minung pawl in remdaihnak an duh” tiah pehbet in a rak sim ih mizo khal in mai tuanvo tuan ciar dingah a rak forhfial.
“A netnak ah “ hi mi ih teltu ram pawl ih mipi pawl khal ka sawm duh” tiah Pope Leo XIV in a rak sim. “Ramuk tu pawl, Hluatdaw ih palai pawl kha pehtlaih in remdaihnak hrang tuah dingah ralbuainak le doawknak kha kan duh lo thu sim uh, ka lungawi” tiah a rak sim. Hi mi thuthang cu Vatican thuthang in kan ngan mi asi.
