“Easter puai in a sungdah lo ding mi ruahsannak in pe” tiah Pope Leo XIV in sim.(April 5, 2026)

Easter Sunday ni Missa raithawinakah Pope Leo in Jesuh a thawhsalnak kan thannak cu “a siat dah lo mi ruahsannak, a mit dah lo mi tleunak, ziangtik khal ih laksak thei lo ding mi lungawinak kha in pe asi. Thihnak cu ziangtik lai caan khal ah a neh ih a tu ah cun thihnak in kan parah thu a nei nawn lo” tiah a sim.

St.Peter Tualrawn ih minung thawng sawm ngan luan an pumkhawm lai caan ah Easter puai hoha in a tuah tu Pope Leo in tui ni ah ziang hmuahhmuah cu “ a thar in an tleu” tiah a rak sim. “Leilung pi ihsin thangthatnak hla tlun ih a kai vekin kan ni khal kan lung a awi cio, Jesuh a nungsal zo, a mah thawn kanni khal a thar mi nunnak kha kan ngah ciar asi” ti khal in arak sim.

Pope Leo in “Easter ti mi cu kan nunram thawn thuanthu ih a san kha ret mi thil a si” tiah a rak sim. Thihnak thawn kan tongaw ih kan thin a bang lai caan hman ah Easter in “a siat dah lo mi ruahsannak, a mal dah lo mi tleunak, ziang khal ih lak sak thei lo mi lungawinak” kha in pe. Ziangruangah tile “ thihnak cu a neh zo ih a tu ah cun thihnak in kan parah thu a nei nawn lo” tiah a rak sim.

Easter puaipi cu St. Peter tualrawn ah tuah a si ih tulips, daffodils, hyacinths tivek pangpar 65000 luan in cawimawi a si. Cuihlei ah pangpar phunphun 7800 hrawng le plumosa, willow khal 1200 luang ret in mawi zet in timtuah a si.

Tui kum cu Netherland ram in Pope kha Easter ah Pangpar laksawng an peknak kum 40 kimnak a si. Hi mi caanserh cu Duch Bishops’ Conference thawn Bloemenpracht Rome Foundation pawl thawn kom in an tuah mi a si.

Pope Leo in a thusimnak cu petbet in a simnak ah Easter ih ruahsannak thawn tleunak cohlannak cu a ol ringring lo tiah a sim. Ziangah tile thihnak ih thazaang in kan sunglam le a lenglam khal ah in hringhro ringring ruangah a si.

Pope Leo in “kan mah pawl ih sualnak pawl a rih tuk ruangah thla phar in zamthei lo dingin a kham thei”tiah asim. Cuihlei ah harsatnak ruangah ruahsannak hlo in “ a sung um lo mi lamzin pakhat sungah  khum mi vekin khal kan tuar thei” ti khal in a rak sim.

Pope in a lenglam khal ah thihnak cu nitin kan hmu asi tiah a sim. Dik lonak pawl, maizawn lawng ruahnak pawl, farah pawl namnehnak pawl, thanau tu pawl ziangih rel lo nak pawl sungin kan hmu thei a si. Cuisin leitlun ih tuahmawhawknak ih hriamhma pawl khal mitin in hmuh a thei tiah a sim ih thanau mi pawl nehrawknak ih hmansual nak, leilungpi ih pek mi thil mankhung pawl cuhawknak ih hamtamnak, minung kha that ih a siatsuah mi ralbuainak ruangah hmuntin ah thinnatnak aw pawl a suak rero a si” tiah a rak sim.

Pope in Easter ( Thosal) puai in “ kan mah pawl kha kan mit tlunah mengin thinlung on dingah in sawm asi” tiah a rak sim. Ziangruangah tile “Pathian cu a nungih kan mah thawn a um” tiah a sim.

Pope in a cemnak ih a simnak ah a thosal mi Jesuh Khrih in a tak in ruahsannak in pek. Cuihlei ah thawhsal nak cu “ thihnak hnak in a hnget deuh mi nunnak thar pakhat cu minung pawl hrangah a tu a tleu thok zo” tiah a rak phuang.

Khrih ih a thawhsalnak cu a thar ih sersiamnak a si ih nunnak thawn a thosal mi Bawipa thawngin a cang mi asi. Cu mi cu a thar mi a thawhnak pakhat a siih hlanlai ihsin a ral kha Pathian ih nehnak ruangah netabik ah cun kumkhua nunnak ah a cannak a si. tuisun kan ni ih hi ruahsannak ih hla kha a hleice in kan tul mi asi. Khrih thawn a thosal mi dinhmun in Bawipa cu leitlun ih lamzinpi parah kan ken a tul asi.

Curuangah Madalena vekin tlan phah in Bawipai thu mitin hnenah than uh si. thawhsalnakih lungawinak kha kan nunramah langter uh si. Cuti lawngah thihnak ih phenthlam pawl a um nak hmun tinah nunnak ih tleunak cu a tleu in a vang thei ding asi. Hi mi thuthangtha cu Vatican thuthang in a tawizawngin kan ngan mi asi.