April 2
“Minim Friars” ti mi kaing rak din tu, Mithianghlim Francis cu kum 1416 ah Italy ram, Paola khuapi ah a rak suak. Kum reipi fa te neih an duh zet nain a nei thei lo tu a nu le a pa cu Mithianghlim Francis Assisi ih thlacam sak nak thawngin fapa an neih ruangah an fapa ih hmin ah ‘Francis’ tiah hmin an pek.
Francis cu a kum 16 ah tipithuanthum kap ih a um mi lungkua pakhat sungah hramlak ih Pathian thu ruat tu Yatih dinhmun in Pathian thu ruah a rak thok.
A thianfainak le Pathian thu a duh nak ruangah mi tampi in a dung an thlun ih a hmaisabik “Nautabik pawl” ti mi kaing a rak din.
Cu mi cu “Pathian ih Pawlpi ah a nautabik” ti duh san ih a rak hril mi a si. An mah cu ihphah zianghman um lo in leilung parah an it ih rawl ulhnak, sa ulh nak pawl thawn an nun an rak hmang.
Francis in, “Ka unau pawl, thlarau lam zoh tha dingah ka lo forhfial a si. Thih nak cu zohman ih el theih lo mi a si. Milai nunnak cu a tawi ih meisa khu vek in a hl oral ding” tiah a dungthluntu pawl hnenah a rak sim.
Kum 1481 ah Mithianghlim Francis in thi zik te ih nat nak a tuar tu Siangpahrang Louis hleikhat nak ih dilnak ruangah France ram ah a rak feh.
Mithianghlim Francis in, “Pathian in, Siangpahrang pawl ih nunnak khal a nei a si,” tiah a rak sim. Siangpahrang Louis cu a natnak in a dam hrih lo nain Pathian ih kut ah thih tha ih a thih ding thu cu Mithianghlim Francis hnenin a rak thei cia.
Siangpahrang Louis ih ro a co tu ding a pariatnak Siangpahrang Charles in Mithianghlim Francis cu a ruahnak petu ah a ret ih France ram le Italy ram pawl ah Yatih tlawng pawl a rak sak. Paola khuapi ih Mithianghlim Francis cu kum 1507 ah a nunnak a rak cem a si.
Mithianghlim Francis Paola cu Pathian ih duhnak thlun in leitlun thilri pawl tanta in le khuapi suahsan in Pathian a rak hawl bangin kan nih khal nitin kan nunnak ah Pathian duhnak hawl tlang uh si tiah kan lo sawm.
