“Ziangtik hman ah ka lo hngilh lo ding” Leitlun pi le pu pawl le kum upa pawl ni hrangah thu luu suah. (February 10, 2026)

Vatican ih Dicastery for Laity, Family and Life pawlkom pawl in kan dung Tlawngkai nihnih ni ih an suah mi thuthan pakhat ah a vei 6 nak leitlun pi le pu pawl le kum upa pawl ni hrangih thu luu cu “ ziangtik hman ah ka lo hngilh lo ding” (Isaih 49:15 ) tiah ngamhnget a si thu thannak an rak nei.

Hi mi thuluu cu Pathian ih a hngilh lo mi duhdawtnak kha a langsar ter bangin kum upa pawl ih manhlatzia le an thupit zia khal ralrinnak a pe asi. Vatican ih Dicastery for Laity, Family and Life pawlkom pawl ih an suahnak ah Pope Leo XIV nak in avei 6nak leitlun pi le pu, kum upa pawl ni hrangah “Nang cu ziangtik hmanah ka lo hngilh lo ding” (Is 49:15) sungta kha thuluu ah a hril thu thannak an rak nei.

Leitlun pi le pu pawl le kum upa pawl ni cu 2021 kumah nunnak cem zo tu Pope Francis in a rak dinthok mi a si ih July thla 26 ah tuah a si theu. Hi ni cu kum upa pawl hnen ih Pawlpi in naiten a um thu thei ter dingah le innsang pawl le nunphung karlak ah an mai telnak kha khaisang dingah tumtah a si. Tuikum ah hi ni cu mithianghlim Jochim le Anna ih puai ni a si ih Pope Leo in Cathedral le Diocese tin ah Missa raithawinak ih Eucharistic Liturgy in hi ni ah hmang dingah sawmnak a rak nei.

Prophet Isaih sungta cu pi le pu pawl le kumupa pawl hnen tha peknak le ruahsannak pe dingah tumtah a si ih a hleice in a dangte ih umtu pawl le hngilh tuartu pawl hrangah a si. Cuitlunah innsang pawl le Pawlpi pawl khal an mah hngilh lo dingah ralrin peknak a si ih an mah pawl an umnak cu a manhla le an thathnemnak thei thei dingah a si.

Dicastery for Laity, Family and Life cu Pawlpi sungih pawlkom dangdang pawl, Pawlpi sungah hi ni cu khaisang in tuah thei dingah tidaan hawl tlang dingah a rak forhfial. Hi tumtahnak cu biaknak lam hrambun pawl hnen neta ah thusuah sal ding a si thu theih ter nak an nei a si. hi mi thuthang cu Vatican thuthangin a rem thei bik dingih kan ngan mi asi.