Milai ih Pathian Lehrulhnak Ka Zum
Milai in Pathian ih kawh nak cu ziangtin a sawn?
Milai in Pathian cu thuthlunnak le thudik cohlannak in Pathian ih zaangfahnak thawn a sawn a si.
- Baibal Ca Thianghlim sungah zumnak thawn Pathian thungai tu zo pawl an si?
Baibal Ca Thianghlim sungah zumnak thawn Pathian thungai tu tampi kan hmu. Asinan, a hleice in Abraham le Mary ih zumnak cu a cuangce in kan hmu thei a si. Abraham ih zumnak cu hniksak a si tikah tangdawrnak thawn Pathian ih kawhnak cu a sawn ringring a si (cf. Romans 4:3). Curuangah Abraham cu “zumtu pawl ih Pa” tiah kawh a si (Romans 4:11-18).
A pahnihnak cu mi thianghlim Mary a si. Mary cun leitlun ih a nunsung hmuahhmuah ah famkim ten tangdornak thawn Pathian a sawn a si. Pathian ih vancung mi in Mary cu Thiang Thlarau thawn nau na vun ding a si tiih thu a than tik ah Mary in vancung mi cu hi tin a sawn: “Na ṭongkam bangin ka parah cang ko seh” a ti (Luka 1:38).
- Pathian ka zum timi cu ziang ti can so a si?
Pathian ka zum a titu cu Pathian thawn kop aw in, thudik le thuhmaan a pom ih a thlun tu khi a si. Bawi thumkom Pathian pakhat, Pa, Fapa le Thianghlarau a zumtu tinak a si.
- Zumnak cu ziangtin kan theithei? Cun zumnak ih lamdannak cu ziang a si?
Rundamnak hrangah zumnak a ṭul. Zumnak cu Pathian in a lak ih in pek mi laksawng a si ih thinniamnak thawn a hawl tu hmuahhuah in kan co thei a si. Zumnak cu Pathian ih forhnak thawn milai in thudik pom in a ruahnak thawn a tuah mi a si. Zumnak cu Pathian Ṭongkam parih dinmi a si ruangah a hngetkho. Duhdawtnak thawn hna a ṭuan (cf. Galati 5:6) ih cat loin Pathian Ṭongkam ngainak le thlacamnak thawn a ṭhang vivo. Vancung ram ih nomnak khal zumnak in kan thep thei a si.
- Zumnak le leitlun thiamnak an kalh aw lo. Ziangruangah?
Zumnak cu ruahnak hnak in a thupi sawn a si. Sihmansehla, zumnak le ruahnak cu Pathian hnen ihsin a ra mi an si ruangah ziangtik hmanah an kalh aw thei lo a si. Zumnak le ruahnak cu Pathian ih pek mi an si.
