ṬHEN THUMNAK
KHRIH SUNGIH NUNNAK
Pathian ih Milai A Kawhnak
357. Zumtu ih nunnak cu zumnak le sacrament pawl thawn ziangtin pehtlaih awknak an nei?
Zumnak le sacrament pawl cu an pehtlaih aw ringring. A takin kan sim a si le, sacrament pawl ihsin Khrih ih zaangfah lainatnak le Thiang Thlarau ih laksawng pawl kan ngah a si.
MILAI IH UPATLAK SINAK
Pathian ih Hmuihmel Keng Milai
358. Milai ih upattlak sinak cu ziang in a thok?
Milai ih upattlak sinak cu Pathian ih hmuimel kengih sersiamnak in a thok. A thithei lo mi thlarau, thu theih theinak le mah thu ih thilti theinak pek a si vek in milai cu Pathian hnenih feh dingin le kumkhua lungawinak ah khawh a si.
Lungawinak le Thlawsuahnak ih Kawh Mi
Kan Sinak
359. Milai in ziang vek in thlawsuah kan co?
Thlawhsuahnak cu Khrih ih zaangfah lainatnak in kan co a si. Thuthangṭha sungah Khrih in a dungthlun tu pawl hnenah lamzin a hmuh. Cuih lamzin cun kumkhua nunnuamnak hmunah a feh pi. Khrih ih zaangfah lainatnak cu mikip hnenah a cangvai. Culen milai in thuhman le thlilṭha a hawl ih thil ṭhalo cu a hrial.
360. Ziangruangah Bawi Jesuh ih sim mi lungawinak thu pariat pawl cu kan hrangah a thupi?
Lungawinak thu pariat pawl cu a thupibik mi Jesuh ih thuthangṭha sim mi an si. Himi pawl in Abraham ihsin thok in Pathian ih tuah mi thu tiamkam mi pawl an kim ter. Cun a dik mi Khristian nun le ziaza an lang ter. Milai cangvaihnak ih tumtah mi khal an lang ter.
361. Jesuh ih sim mi lungawinak thu pariat pawl le kan duhmi lungawinak cu ziang vek in pehtlaih awknak an nei?
Pathian in ka hnenah ra hai seh tiah milai pawl ih thinlung sungih a ret mi nom duhnak cu lungawinak thu pariat pawl in an sawn. Hi kan duh mi le kan hngah hlap mi cu Pathian lawngin in pe thei.
362. Kumkhua nunnuamnak kan timi cu ziang a si?
Kumkhua nunnuamnak kan timi cu Pathian ih hmuitin mi a siih “Pathian ih sinak ah siseh, Khrih ih sumparnak ah siseh, Thumkom Pathian ih nunnak ah siseh, a tel ve tu kan si. Hi nomnak cu milai ih thilti theinak pawl a lan ṭheh a si. Cun hi nomnak cu a sunglawi zet mi le tahṭhim theih lo mi Pathian ih laksawng a si. Hi tiamkam mi nomnak in ziaza ṭhatnak le ziang hmuahhmuah hnak in Pathian duhdawt sawn dingin in sawm a si.
