RVA Falam Service, September 4, 2026

Arab ramih Latin daan a hmang tu Bishop pawlkom thawn Rome ih an tongawk laiah Pope Leo XIV in ramkhelthu, pawlkom le kawhhran buainak lakih a um tu pawl hrangah zawnruahnak, zumnak le tharthoh salnak thawn pehpar in thu a rak sim a si.

Zumnak le ralthatnak kha sunlawih

Iraq le Siria vekin ralbuainak hmun pawl ih um khrihstian pawl ih ralthatzetih tetti khannak pawl kha theihter nak a nei ih an nih cu mi malte an si konan cathianghlim parah rinumnak a nei tu pawl kha a rak lawm.

Hriamhma tuartu pawl thawn fehtlangnak

Bishop pawl le hotu pawl cu harsatnak le um hmun suah san tu innsungsang pawl kha cazirnak tlawng, siizung le kawhhran lamin ngaihvennak, hnemnak le bawmnak pe phahin khrihfa pawl thawn nai aw ten um dingah a rak forhfial.

Harsatnak ruangih hmundangih hnatuan pawl hmuahnak

Tipi kap ramih harsatnak ruangih hmundangih hnatuan tu pawl kha hleice in ralring dingah a rak sim ih “Nan inn cu nan kiangkap ih um mi pawl mikhual vekih thinlung an neih lonak inn si hramseh” tin ralringnak a rak pe a si.

Daan dangdang parih pehtlaiawknak

Muslim pawl lak le a bang aw lo mi khrihstian pawl lakah duhdawt aw zetin thurel khawmnak tuah dingah hleice in a rak simih thurel khawmnak ti mi cu mai phunhnam ih daan le dun tlan sannak siloin tihphannak um loih tongawknak a si tin a rak ti.

Ral buainak in zumlonak thlaici vorhnak hmun pawl kha upatnak, pawlkomnak thawn khat le khat upat awknak cu tharthoh salnak le remdaihnak lamih ke karnak a si thei tin a rak sim.

Hlawhtlinnak aiin rinumnak hawlnak

Pope in kawhhran hotu pawl kha “hlawhtlinak a silole miih cohlannak kha hawlhlah, rinumnak kha hawl aw. Thudik, thuhman le remdaihnak ih aw thawm pawl ansi” tin a rak sim. Nisuahnak lam a laifannak le Irab ramih um pawlpi pawl kha remdaihnak dintu pawl, duhdawtnak ih tetti pawl in an dinhnget ringring theinak dingah thla cam sak cio uhsi tin a rak sim.

Himi thuthang cu Vatican Thuthang in kan ngah mi a si.

September 3, 2026