Pope Leo cun August ni 5 ah, Castel Gandolfo ah colhcan a hman hnu ah Vatican tualrawn pi ah mipi pawl tonnak a nei sal. St. Peter tualrawn pi ah zumtu thawngtampi pawl hnen ah Constitution Sacrosanctum Concilium thuhla ruat phah in Biakinn khawmnak ih thlacam dan a thupit zia kha a hleice in a sim.
“St. Paul ih ruahnak a pek vek in, thlacam in zirh tu cu Thiangthlarau a si,” tin Pope in a sim. “ Penticost ni ihsin thok in, Thiangthlarau Pathian cu Kawhhran sung ah a um, a cangvaihnak pawl, a hleice in thlacamnak kha mikip hnen ah a theiter. Cuisin thok in, Kawhhran in “ BawiJesu thihnak ih sin a thawh sal nak thuthuk puai tuah ding kha a pelhdah lo”.
A dik mi thlacam dan hmuhsalnak
Pope ih a sim bet mi cu, “Tui san ahcun, thansonak le sumpai tamtuk hman theinak in a neh tuk ih, thlacam hi ziang hman sullam nei nawn lo vek tla a bang”. “Tikpan le cet lam thiamnak in ziangtinkim a ti fiang ter thei” tin an ti rero lai ah, hi leitlun ahcun thlacam hi cu mai bulpak thatnak hrang tumtah ih thinlung thlaraulam zirh nak dang men a si” tin ruahnak a um thei men. Ziangkhal le, thlacamnak cu “a sinak dik tak ih hmuhsuah sal a tlak hrimhrim ” tiah a ti.
Pathian thawn tonawknak hmun
Sacrosanctum Concilium timi upadi cun a tulzia hi a thupit pi ngaingai. Conciliar capi sung ih an suah mi ah, “thlacam” ti mi tongfang cu Pathian biaknak a si ti a pumhlum in a lang ter. Himi an thlirdan cu a thupi zet , “ziangahtile cumi cun biaknak dan rem thatnak lam a hruai ih, zumtu pawl ih telpitnak hi a thupi bik mi a si,” tin Pope Leo in a sim.
Pathian biaknak cu a hmaisabik le a thu pi bik mi ti in “Pathian in minung le a Fapa naih aw ding in tonawknak hmun” ti ih a hmalak nak a si.
Nitin nunnak thianghlim ter ding
Nitin ten, tuah mi Missa raithawinak le thlacamnak Caan pawl hi cu “Kawhhran ih nunnak thawpi a si, cuih nunak cun a pumsa sungah Thiangthlarau cangvaihnak a pek”. Hi thlacamnak ah Khrih cun “mi hmuahhmuah cu a mah ah a kom ter ih, Pathian thangthatnak hla a sak nak thawn a pehzom aw ter a si”.
“Tleunak thawn a khat mi Bawipai’ thawinak thawn pehzom aw in, Biaknak thlacamnak caan pawl in nitin kan hring nun in thiang hlim ter, tin thlacamnak phun dangdang thu a sim hlan te ah Pope Leo cun a sim; “zinglam ah, lungawinak le zumnak thu sim in kan thok; Sunhnu ah, rinum zet ih hna kan tuan thei nak ding ah thazang cahnak kan dil; Zan lam ah, hnatuan kan theh hnu ah niluh zawn thlun in zanlam thlacam nak le zanriah kan pehzom ; Zan ah, Pathian ih daihnak sung ah kan mah le mah ap aw in kan itthat.
Pope Leo cun a netnak ah, “caan tin hi ruahsannak ih cangvaihnak a si” ih, “ Leitlun khual kan tlawn lai ah, sunglawizet in Bawipa a rat sal ding kha Kawhhran hmuahhmuah in kan hngak a si.” tin a sim.
Hi thuthang cu Vatican news sung ihsin lak mi a si.
