July 22
Mithianghlim Magdalene cu Martha le Lazaru ih nau a si ih a sung ih khuasia pasarih rak lut dah mi khal a si. (Lk 8:2) ah kan hmu thei. A mah cu Judah khua ih um Bethlehem mi a si nan Galile ih um Magdala ih a nunnak a rak thleng ruangah Magdalene tiin mi ih run theih mi a si.
Bawi Jesuh cu Farasi pakhat a si mi Simon ih inn ih rawl a ei lai ah Maria cu Bawi Jesuh ih kee kha a mitthli thawn a kholh sak ih rimhmui a hnih sak. Cu mi cu Simon in a hmuh tikah Bawi Jesuh in Maria ih sual nak tampi a ngaithiam zo ruangah a duh a si a ti. Cuih hnu ih Maria cu Bawi Jesuh ih dungthlutu pawl hrangah a tul mi pawl tuah sak theu tu nunau pakhat ah a tel ve.
Voikhat cu Jesuh le a dunthluntu pawl cu Betani ih um Lazaru ih inn ah an feh lai ah Maria cu Jesuh ih keehram ah hnatuan lo in a thu sim mi a ngai lai ah a U Martha in Jesuh hnenah, “Bawipa, ka nau nu hi hnatuan lo-in a to rero men hi na poisa lo maw si? Sim aw, I ra bawm seh!” tiah a ti ih Jesuh in, “Martha, Martha! Nang cu thil tampi parah helhkam in na um; a tul ngaingai mi cu pakhat lawng a si. Cu mi cu Maria in a hril ngah ih zohman in an long nawn lo pei,” tiah a ti.
Harsat nak a tuar nak ding niruk a duh ah Bawipa cu Betani ih um Lazaru ih inn kiang a feh lai ah Marie Magdalene in Bawipa ih kee ah rimhmui a rak hnih sak la la ih cu mi cu Judah Iskarot in a hmuh tikah cuih mankhung rimhmui cu zuar tahrat in mifarah pawl pe sawn seh la a tha sawn ding tiah a ti.
Cu tikah Jesuh in, “Hi nu hi mawhthluk hlah uh! Ka ruak phum ni hrangih a tuah ding mi cu tuah ko seh. Mifarah pawl cu nan lak ah an um ringring ko ding; Asinan kei cu nan lak ah ka um ringring lo ding,” tiah a ti. (Jn 12:7-8) sungah fiang zet in kan hmu thei.
Maria Magdalene cu thlaanleng ah a ding ih a tap rero. Cutiih a tap phah in thlaan a vun bih ih, Vancungmi pahnih cu puanraang thawn thuam aw in Jesuh ruak an rak ret nak ah khan a lu lam ah pakhat, a kee lamah pakhat an to kha a hmu.
A nih in, “Ka Bawipa zo in si maw an lak ih khuitawkah an ret ti ka thei lo,” tiah a sawn. Cule Maria cu a her ih cutawk ih Jesuh a din kha a hmu. Asinan, Jesuh a si kha a thei lo. Jesuh ih, “Nunau nu, ziangah so na tah rero? Zo so na hawl?” tiah a sut. Cu tiih a bia tu cu hmuan kiltu tin a ruat ih Maria cun, “Bawipa, nangmah in na lak a si ah cun na ret nak kha I sim aw la ka feh dingih ka va la ding,” tiah a ti.
Jesuh in, “Mari!” tiah a vun ko. Maria cun Jesuh lam ah hoi in Hebru tong in “Rabboni!” tiah a ti. Rabboni ti cu Sayapa tican a si. Jesuh in Mari cu, “I kai hlah! Ziangah tile Pa hnenah ka thleng hrih lo. Asinan, ka unau pawl hnenah va sim awla “An Pa a si ve mi Ka Pa, an Pathian a si ve mi Ka Pathian hnenah ka feh ding a ti,” tiah va sim aw,” tiah a ti. Cu thuhla cu Jn 20:11-18 sungah fiangzet in a ngan a si.
