St. Peter To Rot cu 1912 kum ah Rakunai khua, Papua New Guinea ram ah a suak. A nu le pa hi a hmaisabik Catholic rak lut tu an si.  To Rot cu Pathian thu duhzet tu a si. An Siangbawipa in Siangbawi tlawng kai theiding tin a ruah mi asinan, a pa sawn in cumi lai ah an um nak hmun ah hin Catholic ih daan (nunphung) pawl hi a hngettuk hrih lo ruangah zohman siangbawi cang ding ah cun an sithiam hrih lo ding tin a ruahruang ah pathian thuzirh tu saya ah a cang. 1936 kum ah innsang a nei ih fa pathum an nei.

1942 kum Japan ralkap pawl in an um nak hmun an rak luah lai ah, Catholic pawlpi hrangah Peter To Rot pakhat te lawng hi thlarau lam hruai tu an neih sun a si. Japan pawl in biakinn pawl khal an siatsuah theh ih hlei ah  ramdang mi missionary pawl hmuahhmuah cu thawng an thlak theh. To Rot cun thinghgne tete thawn biak inn te a sak ih Christian zumnak hlo lo ding in tuanvo tum zet a rak la. Cu ti cun, sacrament sangtul mi pawl hmuahhmuah: nauhak pawl tipil nak, kutsih nak, Bawipai thi le sa sannak le biaknak lam thlacam nak pawl hmuahhmuah khal cu amah in a hruai. 

Japan ralbawi pawl in Christian biaknak an kham ih,  nupi pasal tam pi neih theinak sawn kha an rak sim ih, phunhnam hrekkhat  hotu pawl  in  cu mi cu an lung kim pi ve. Cui nupi pasal tampi thitthei nak thu kha To Rot in ralthazet in hi mi cu Christian zumnak thawn a kalh aw a si tin a do ruangah, 1945, April, May thlahnih sung thawnginn ah an khum hnu ah Japan doctor pa in thihnak sii a dawt ih, a hnar le a hna ah thaw thawthei lo ding in patpe an ben, cule a ling let in an thlai ih a thi. A mah cu Papua New Guinea ram ihsin Pawlpi hrangah thihnak tuartu tiih a hmaisabik mithianghlim cannak ngahtu a si.

October 19, 2025 ah Pope Leo in Vatican St. Peter Basilica biak inn pi ah mithianghlim sinak a pek a si.

Peter To Rot ih a thlacam theu mi cu, kan inn sungsang nun ah siseh, ka hnatuan nak ah siseh, nitin ka nunnak ah siseh thianghlim te in ka nun thei nak ding ah I bawm hram aw, ti hi a si.