Pathian ih Tumtah Mi Pawlpi

147. “Pawlpi” timi ṭongfang ih ti can cu ziang a si?

“Pawlpi” timi ṭongfang in hmuntin ramtin ih Pathian ih kawh mi pawl a khih hmuh a si. Zumnak le Tihnimnak ruangin pumkhat ah an cangih Pathian ih fa, Khrih ih minung le Thiang Thlarau ih biakinn ah an cang.

148. Baibal sungah Pawlpi ih hmin le hmuihmel pawl ziang vek in kan hmu thei?

Baibal sungah mangbangza Pawlpi ih hmin le hmuihmel pawl kan hmu thei. Baibal hlun sungah Pawlpi cu Pathian ih “minung” tin kan hmu. Baibal thar ah cun Khrih cu Pathian ih minung pawl ih Lu a si ih minung pawl cu a maih “ruangpumpi” a si, tin kan hmu. Cuih hleiah, tuurun, hmuan duum, sabit hmuan duum, umnak hmun, lungto, biakinn, nupi, nu, innsang timi pawl khal Pawpi khih hmuhnak ah hman an si.

149. Pawlpi ih hramthawhnak le famkimnak cu ziang a si?

Pawlpi in a maih hramthawhnak le famkimnak cu Pathian ih kumkhua lairel nak a si, tin a hmu. Pawlpi cu hmailei caan ah miphun hmuahhmuah pawlkomnak dingih khihhmuhnak hrangah thukam hlun sungah Isarael pawl hrilnak thawn timtuah a si. Pawlpi cu Jesuh Khrih ih ṭongkam le hnaṭuannak ihsin dinmi a si vek in le Jesuh ih thihnak le thawhsaknak ih famkim ter mi a si vek in mangbangza rundamnak a sinak cu Pentecost puaini ih Thiang Thlarau ṭumnak in lang ter a si. Pawlpi cu vancung ram ih thawm ṭhatnak sungah, rundammi mi ruun ih innpi a si tin, famkim ter a si ding.  

150. Pawlpi ih hnaṭuan cu ziang a si?

Pawlpi ih hnaṭuan cu, Jesuh Khrih ih ṭuan thok cia mi, Pathian ih uknak ram din ding le cuih ram ih thuthangṭha phuan ding a si. Pawlpi cu cuih rundamnak ram ih thlaici thawhnak a si.

151. Ziangvek in Pawlpi cu mangbangza a si?

Thiang Thlarau hnaṭuannak cu milai mit ih hmuh theih mi thil parih a um le a cangvai kulh sungah cun Pawlpi cu “mangbangza Pawlpi” tiah kan ko thei a si.

152.  Ziangruangah Pawlpi cu leitlun rundamnak sacrament a si kan ti?

            Pawlpi cu Pathian thawi remawknak le komawknak ih hminsinnak le hmanrua a si. Cuih hleiah Pawlpi cu miphun zakip ih pumkhat sinak a si.