Kum 2001 kum ih , Mifarah harsa pawl bawmh ruang ih thahtuar tu Italian missionary Fr. Nazareno Lanciotti cu June 13, 2026 ah Our Lady of the Pillar Parish, Jauru, Brazil ram ah Mithliaghlim si nak co theinak ding ih a reng khat nak ah khaisan a si.
Fr. Nazareno Lanciotti cu Italy ram Rome khuapi ah March 3, 1940 ah asuak ih 1966 ah Puithiam si nak a rak ngah. 1971 ah Brazil ram , Jauru ah Pathian riantuan ding in a thleng. Taimak zet le duhsak nak thawn Pathian hna a tuan nak ruang ah a mah thei tu pawl hmuahhmuah ih thinlung sung ah tui ni tiang a caam ringring. “A sentet lai ah cu micapoh a hmang tak, a sinan Siangbawitlawng a luh hnu ih sin thinlung sung te ih daiten thlacam le mi thungai tihzah nak pawl a zir. Bawipa thi le sa upat nak le Bawinu Mary upat nak thawn thlacam hi a rak zuam zet. Puithiam cannak a ngah ni ih Bawinu Mary hnen ih thil pahnih a dil mi cu: thianghlim te um thei ding in le paisa duhham nak thinlung hlon thei ding in tin” thla a cam tiah a rual pi Osvaldo Piva in a sim.
Fr. Nazareno cu, meisa (Electricty) um lo nak le midang pawl thawn pehtlaih awk nak harsat zet nak hmun ah a um ko nain a thinlung in Pathian ih kilkhawinak huham a tum zia hi a zumhnak in a lang ter.
“Thil tampi a tuah thei; a cang thei lo tiih ruah mi hman cangthei ter tu a si. Paisa a nei lo. Nikhat cu innsak nak thilman pawl pek ding ni a rung thleng , 7500reais lawng a nei. Rinlo pin a a kut sung ah paisa a tul zat cu a rung thleng. Pathian ih kilkhawi nak in ziangtik hman ah a tansan siang lo” ti kha a lang tin a rual pi pa in a sim.
A mah thawn rualpi tha aw zet mi, Otavio ti mi pa ih a sim mi cu, “Fr. Nazareno thawn phone thawn kan bia aw theu. Ka inn ah a ra leng theu cu le kei khal a hnen ah ka va umpi theu . Kumtinten, December thla a rungthlen cun ka fa le khal ka hruai ih in rak cangcawi theu. A veikhat nak ka ton ah cun, Italian mi tihnung um deuh tin ka hmu. A hnen ih Sualthlah feh ding tla hi in kawk pang pei maw tin tla ka phang zet. A sinan, sual ka vun thlah taktak ah cun ka ruah vek si lo in Bawipa thi le sa sung ih um mi Jesu vek rori in ka thinlung I hlau. Sualthlah ti mi cu fapa tlan hlo a pai hnen ih a ra kirsal vek kha a si tin a ti theu.” tin a sim.
Marian Siangbawi pawl
Fr. Nazareno cu Brazil ah Marian Movement of Priests ih hotu bik rian rak tuan tu a si. A tu ih Marian Movement ih aiawh tu ih tuanvo nei tu pa Otavio in “ Fr. Nazareno cu Mary le Bawipa thi le sa tlun ih upatnak sang zet nei tu le sualthlah nak khal ngaisa thei tu, sualcawhkuan nak khal nasa zet ih tuahthei tu a si.” tin a ti.
Father Nazareno Lanciotti (left), Father Stefano Gobbi (center), and Otávio Piva (right)
Thihnak tuar tiang rin-um tu
Fr. Nazareno cu amah le mah kha mi farah harsa bik pawl le mi ih ziangsiar lo ih an hnon mi pawl hrang ah tithei tawk ih hnatuan tu a si. Our Lady of the Pillar parish ih a um lai ah, Mi bawmtu pawlkom a dinsak ih, Siivai lam khal , hnatuan nei lo pawl, cun thilthalo tuah tu mi hlawhhlang pawl tivek pawl ih an tulsamh vek in a bawm. Hi ti ih a hnatha tuan duh lo tu mi pa hnih cu, Feb 11, 2001 zan ah khan, lukhuh khum in a inn ah luttahrat in Fr. Nazareno ih a dunglam lu ah pakhat in a kah . Father pa cu a thaizing Feb 22, a kum 61ah a duhdawt zet mi Nu Mary vek in a rianmi a Pathian hnen ah a nunnak cu a liam. Fr. Nazereno ih thihnak cu (zumhnak ruang ih huatnak tuar tu-Martyrdom in odium fidei) tin on April 14, 2025 ih Pope Francis ih a nemhnget mi thupek nak sung vek in pawlpi in a cohlang a si. .Fr. Nazareno cu June 13, Our lady of Pillar, Jauru khua ah 10;00a.m ah Pope aiawh tu Cardinal João Braz de Aviz in mithianghlim si nak rengkhat nak dinhmun ah khaisan asi.
Himi thuthang cu Vatican news in kan don mi a si.
