Tu hrawngih a laar zet mi Sagrada Familia Biakinnpi thawn pehpar in a thupi deuh pawl kan run tarlang duh.
Hi Biakinnpi cu Spain ram, Barcelona khuapi ih leitlun huap mikhual pawl hmuahhmuah ih mit la bik tu thil maksak pakhat a si.
Tuih kan hmuhmi Biakinnpi design rak suai thok tu le a rak sak thok tu hi Antoni Gaudi a si. A kum 31 (1883) ah a rak thok ih 1926 kum ih a thih ni tiang hi Biakinnpi saknak ah a caan neihmi le a thazang zate’n a rak pe ti a si.
Himi Biakinnpi hi sullam nei zet ih rak sak mi a si. A laifang ih tower sangbik hi Jesu Khrih hrangih tumtah mi a si ih a zim ah Cross an cuangter (Tui tum Pope Leo ih thluasuah a pek mi hi himi tower a si). A sangtu hi Nu Mary hrangih tumtah mi a si ih, a zim ah zum-12 neimi arsi an cuang ter.
A sangtu ah tower 4 an um ih Thuthangtha Ngantu Evangelist 4 hrang tumtah ih sak mi an si. Curuangah anmaih hminsinnak ih rak hman theumi minung zuk (Mt), kiosa zuk (Mk), Cawcang zuk (Lk) le mu vanlai zuk (Jn) ti’n tower ih zim ah an cuangter.
Cumi ih tang a 4nak ah Tirhthlah 12 hrang tumtah ih tuahmi an hmin khen mi tower 12 a um.
Cule, himi Biakinnpi hi Cross pianhmang ih sakmi a si ih hmaihoih 3 nei ih design suaimi a si. Atu ahcun a sir veve ta lawng theh a si hrih. Khat lei lam cu Jesu Khrih ih suahnak langter tu sangkapi (hmai hoih) a si; khat lei lam tu cu a Harsat Tuarnak langter tu a si.
Biakinnpi luhnak sangkapi bik dingih design a rak suaimi cu Sunlawinak langter tu a si ih cumi cu atuah an sak thok hrih lo. Kiangkap mipi umnak inn pawl bal ta a tul ding ruangah an rei deuh lai men ding. An duh vekih cozah le mipi ih lungkimpi a si ahcun 2035 kum ih thehsuak an tum.
Biakinnpi sunglam kan zoh tikah, tupi lak thleng vek rori ih thinlung a la thei mi ceiling mawi zetzet hmuh a si. Himi khal cu Antoni Gaudi hi sersiam mi thil hmuahhmuah duhdawt le upat zet tu a sinak langter tu an si. Țhuam a hman mi pawl khal thingkungpi pianhmang in a rak tuah.
Cule Gaudi ih design a suaimi ahcun khawm-dar khal 84 rori ret a rak tum ih a duhsan cu standard piano ih key umzat a si. Tu ahcun cuzat cu an ret thei hrih lo.
Gaudi thawn pehpar in uar a um zet mi thil dang pakhat cu, Pathian parih zumnak le upat tihzahnak a neih mi te hi a si.
Biakinn design a rak suai tikah Jesu Khrih hrangih a rak tumtah mi tawer hi meters 172.5 (566 ft) sang in a rak tuah. Ziangahtile, Barcelona khuapi kiang ih Montjuïc tlang zim hi meters 173.5 hrawng sang in a rak tuat ih, minung ih tuahsernak in Pathian ih sersiamnak a hleih/hloih thei lo timi langter a duh ruangah ti a si.
Photos: from Internet
