Puithiam pawl in ziangruangah Altar ti khawh mi Pulpit biaktheng an hnam theu?

Missa raithawinak a thawhnak le a cemnak ah Puithiam pawl in Pulpit Biaktheng (Altar) kha kun in an hnam theu. Mitam pi hrangah cun zianghman lo tuahnak pakhat tiah an ruat men thei. Asinan Catholic Pawlpi ah Altar (Pulpit biaktheng) thawn pehpar in san a nei lo mi pakhat hman a um lo.

Altar (Pulpit Biaktheng) cu Cabuai pakhat men a silo, Pulpit Biaktheng cu a menmen mi thilri a silo. Pulpit Biaktheng cu Khrih ih sumnak kha Missa raithawinak tuahnak hmun a si. Van le leilung an tonawknak hmun khal a si. Asan cu Pathian in leilungih a rungtumnak hmun khal a si. Curuangah Puithiam in Biaktheng a hnam tikah thing cabuai le lungpheng a hnam mi a si lo. Altar ih thianhlimnak kha a upat ih a sunloihnak a si sawn.

Hnamnak cu upat sunloihnak ih hminsinnak a si. Bible Casung le hlan nunphung kan zoh khal a sile hi hnamnak cu thil menmen a si lo. Cu mi cu Sunloihnak, duhdawtnak, upat tihzahnak le pehpar aw in neihnak pawl ih hmin sinnak asi.

Puithiam in Altar (Biaktheng a hnamnak cu “hi hmun cu Pathian ih hmun asi’’ ti ih langternak khal a si. Cuithlun ah “Khrih cu hi hmun Biaktheng ah a um” ti mi duhsan khal a nei. Altar (Biaktheng) cu Khrih hminsinnak khal asi. Catholic ih zirhnak ah Altar (Pulpit Biaktheng) cu Khrih a aiawh a si. Ziangah tile Khrih cu thawinak petu kha si, thawinak ah a mah le a mah khal a pe awtu khal a si ruangah asi.

Curuangah Altar (Pulpit Biaktheng) hnamnak cu Khrih upat sunloihnak peknak khal a si. Missa ih a thawhnak le a cemnak hminsinnak a si tin khal kan ti thei. Puithiam cu Missa raithawinak a thawhnakah Pulpit Biaktheng a hnamnak in Khrih kha a hmuak a si. Missa a cemnak Pulpit Biaktheng a hnamnak cu lungawinak thawn cibai a buknak asi. Altar (Pulpit Biaktheng) cu lehlamnak donhlei sang a silo. Pathian le minung tonawknak hmun thianghlim asi. Altar hnamnak cu ttong tel lo mi zir ding mi pakhat asi. Hi mi in “hi hmun hi a thianghlim mi hmun a si” tiah a thupten thannak thawn a bang aw.

Curuangah Puithiam pawl ih upatnak in zumtu pawl khal Pathian umnak hmun upat sunloih dingah ralrinnak in pe thawn a bang aw asi.

Hminsinnak,

• Altar (Pulpit Biaktheng) cu Missa raithawinak hmun lawng asi lo.
• Khirh thawn tonawknak hmun khal a si.
• Puithiam pawl Pulpit Biaktheng hnam nak cu” Pathian cu hi hmunah a um a si” tiah Pawlpi ih simnak asi.