April 29

Mithianghlim Catherine cu 1347, March 25 ah Siena khuapi ah a rak suak. A suahpi unau 25 sungin 24 nak a si. Kumruk a ti ah a u pa Stephen thawn inn an tlun lai ah Catherine cu pangpar la phah in malte dung deuh ih a feh lai ah Bawi Jesuh cu a lu par ah Siangpahrang lukhuh khum in pulpit ah to in mithmai pan ten a kut za san in thluasuah a rak pek rero lai ah a dungtluntu Mithianghlim Petru, Mithianghlim Paul le Mithianghlim John pawl an um kha a rak hmu.

Stephen in a naunu a hni rero men ah a ruat ih a kut in a hei dirh. Curuangah zianghman ih tahthim theih lo mi langnak cu a rak hlo. Cui hnu ah Catherine cu Bawinui sintuh hmaiah a khuk a bil ih thianghlim ten a nunram hmang dingah thu kam a rak tuah. Cui sin thok in Catherine cu Biaknak lam lawng a rak ruat ih pumcawmnak lam a rak ruat lo.

Kum 12 a kim tikah a nu le pawl in Catherine cu innsang nei dingah an rak tumtah ih Catherine cu cei awk dingah an rak fial. An fial vek in a rak tuah ko nan a peih lo ruangah innsang neih a duh lo thu a rak sim.

Asinain, a nu le pa cun an rak fial ringring ruangah a mawi nak hlo ter dingah a mawi zet mi a sam saupi cu a rak tan. Hi mi ruangah a sungkhat zaten Catherine an hua ih inn hnatuan zaten Catherine lawng an rak tuan ter theu. Catherine cun phunzai lo ten thinlung thiang ten thinsau ten a rak um.

A kum 16 ah a nu le pa in Catherine ih a hngetkhoh zet mi a thuboh cat mi an rak theih fiang ruangah a mai duh vek ih tuah an rak on. Curuangah a mai khaan sungah Biaknak lam thlun mi pawl tha ten a tuah ih Dominican kaing sungtel pakhat in rian tuan dingah tumtahnak a rak nei.

Hi vek in Pathian thawn nai aw sinsin dingih a zuam lai ah khuavang ih luatnak a rak pek duh ve lo. Thilsual tuah a peih zet tu mino pawl a rak hmuh ruangah Catherine khal si ve dingah fihnungza in tu le tu langnak a rak hmuh ruangah Catherine in ziang tuah ding thei lo in Bawi Jesuih Thinglamtah hmai ah bok in ‘Maw Bawipa, in bawm lo in ziangtin ka thleng thei ding’ tiah riahsia zet in a rak ti.

Bawi Jesuh khal in ‘Kei cu na thlarau ah ka um ih tha ka lo pek. Sualpi ah thleng in I tan hmaisa tu pawl hnenah ka um thei nawn lo’ tiah a  tiah tha a rak pek.

Nikhat ah Siena khuapi ah puai an tuah rero laiah Catherine cu a hlan vek in a khaan sungah Pathian a rak thangthat. Hmakhat te ah Bawi Jesuh cu Bawinu le Mithianghlim pawl thawn langnak an rak hmuh ih Bawinu in Catherine ih kut a kai ih Bawi Jesuh in cui kut ah zunghruk a rak hruh sak.

Hi thil pawl a can hnu ah Catherine cu a lengah suak in thlarau runnak hna rak tuan. Cui hnatuan pawl cu siizung ah cawl lo in rak bawmnak, thawnginn ah feh in thawngtl apawl thapeknak le a dang Diocese hnatuan pawl tuahnak a si. A hnatuan mi hrekkhat tarlang a si ding.

Siizung ih pitar pakhat cu cancer nat thawn pehpar mi hma pawl thawn natnak a tuar ih a thut tuk ruangah zohman a kiangah an um peih lo.

Asinain, Catherine in nitin ten a hma pawl a rak thianfai ter ko nan pitar nu cun Catherine ih that lo nak lawnglawng a rak rel ringring. Asinan, Catherine in pitar nu cu a thih tiang a rak kilkhawi ih a thih lai ah a mah phumtu dingah zohman an feh lo ruangah a mah rori in khur a rak lai ih a phum thu theih a si.

Kum 378 ah Rome ram biaknak dang kut ih a um lai ah Catholic Pawlpi lawng in siatral nak pawl a rak humhim thei. Pope Gregory in rian tuantu Puithiam pawl a thlah ih Britain ih um biaknak dang pawl Catholic Biaknak ah an rak thleng aw ter.

Cuih sin thok in nitlaknak lam ram pawl ah Pope lawngin Siangpahrang apnak, cawhkuan pek thei nak aanaa a rak nei. Tahthimnak ah kum 800, Christmas puai ni ah Charlemagne cu Rome ram ih Siangpahrang tuan thei dingiah Poe Leo III nak hnenin Siangpahrang lukhuh a rak ngah.

German Siangpahrang Henry IV in Pawlpi ih upadi pawl a pah bal ruangah a mah cu Pope Gergory VII in Pawlpi in a rak dawi. Curuangah a mah cu a sualnak pawl ngaithiam dingah tlangpar lamzin ah kedam tel lo in ke thawn a rak feh ih hramlak vur tlaknak ah nithum sung sualcawhkuannak a rak tuah ruangah a ngaithiam ih a hlan a sinak ah tuanvo a rak pek sal.

France ram Siangpahrang Philip Dibe in Pope ih thupek a thlun lo ruangah a mah cu a Siangpahrang dinhmun in an thlak. Philip cu a thinheng tuk ih a ralkap pawl thawn an feh ih Pope an va kaih. Cui hnu ah a dang Cardinal pawl thawn thu an ron aw ih Bordiaux Archdiocese cu Pope Clement IV ah an rak hril.

Cui hnu ah Pope ih umnak khuapi cu Rome khualipi in France ram ih um Avignon khuapi ah an rak thawn. Kum 70 tiang Pope an thleng vivo ih France ram le a dang kiangkap ih um ram hrekkhat pawl siar lo mi dang in Pope cu upatnak an pek nawn lo. Biaknak lam ih a zuam zet tu pawl khal in Pope zung umnak khuapi, Rome ah ret sal an duh.

Asinan, France Cardinal pawl in ….. thawn a famkim mi an mai dinhmun thleng duh ah an rak lungkim lo. Curuangah Germany, England le Rome ram pawl ah Pope cu a hmin men lawng in an sunloih ih Catholic Pawlpi ih hramthoknak um lo vek a si. Hi vek dinhmun pawl ah Biaknak lam martyr nunau Catherine a rak lang thok.