Asia ram cu leilung tlun ih biaknak tumpi pawl: Buddhism, Hinduism, Islam le Christianity biaknak pawlih umnak hmunpi bik pakhat a si. Curuangah Asia Bishop pawl in Asia ramih Jesui thuthangṭha karhzai thei dingin biaknak thurelkhawmnak a um hrimhrim a ṭul a si, an ti. Biaknak thurelkhawmnak hi phunhnih in ṭhen a si ṭheu. Phunkhatnak cu Jesu Khrih zumlotu pawl thawn biaknak thurelkhawmnak (interreligious dialogue) a siih a phunhnihnak cu zumtu le zumtu pawl karlak ih thurelkhawmnak (ecumenical dialogue) a si.
Zumtu dang unau pawl thawn biaknak thurelkhawmnak hi a ṭulzet. Sikhalsehla a ngaingai ahcun ṭuansuak le tuahsuak a awl lo. Milai in Pathian zaangfahnak co thei ding in hmunkhat tei thlacam tlang cu a thupi zet. Jesui dungthluntu pawl pumkhat an si theinak dingah amah Jesu rori in thla a cam. Cutiih pumkhat an can thei a si ahcun leitlun mi pawl in Jesu cu Pathian ih thlah mi a si, timi olten an cohlang thei ding (cf. Jn 17:21).
Asia ramah Jesu zumtu cu mi malte an si. Asinan cui mi malte sung hman ah biaknak ṭhenṭhek awknak tampi a um. Cui ṭhenṭhek awknak cun Pathian hnaṭuannak cu hnaihnoknak tampi a pek. Curuangah Asia ramih Catholic Kawhhranpi in duhdawnak, ralṭhatnak le rinnak thawn biaknak karlak thurelkhawmnak tuah tengteng dingin nasazet in a forh.
Cun biaknak thurelkhawmnak cu dik le hman ten tuah suak thei dingah thlun ṭul pali an um, tiah Asia Bishop pawl an sim. Cumi pawl cu; pakhatnak ah biaknak dang unau pawl thawn duhdawtnak thawn, ahleice in midang bomnak hnaṭuan tlang duhnak thinlung nei ding; pahnihnak ah Kawhhran parah fekten um ding; pathumnak ah lom le thangṭhat tlak mi pawl hnenah lungawipi ding; palinak ah thianhlimnak le nuntharnak hawl ding timi pawl an si. Asia ramah Catholic Kawhhran le kawhhran dang pawl karah ih biaknak thurelkhawmnak hi har hman sehla tampi tlamtlinnak a um zo a si, tiah Asian Biahop pawl in an sim. Tahṭhimnak ah Orthodox zumtu le Catholic zumtu karlakah tampi rualremnak a um zo.
Bishop pawl in Khristian pawl pumkhat si theinak dingih thlacamnak ah biaknak dang unau pawl sawm dingin Asia ramih um Catholic Kawhhran pawl an forhfial. Cun Christian Pumkhat si thei dingih thlacamnak hmun tuah dingin siseh, biaknak tlawngpawl, tahṭhimnak ah, puithiam cannak tlawng, Sister pawl tlawng le Pathian thuzirhtu saya pawl tlawng pawl ah zumtu pawl pumkhat si thei ding timi ih thupitnak le ṭulnak pawl zirh ciau dingin thapeknak an nei.
Ref: Peter C. Phan, The Asian Synod: Text and Commentaries (Maryknoll: Orbis, 2002), pp. 314-315.
A ngan tu – Rev. Fr. Lucas Tha Ling Sum
