Myanmar ram (Kawlram) Bishop pawlin March 26 ni cu remdaihnak hrang rawl ul thlacamnak ni tiah thei ter. (March 14, 2026)
Myanmar ram ih Catholic Bishop pawl in “Pathian ih fale pawl” hnen an suah mi thuthanah zumtu pawl hnen March 26, 2026, Tlawngkai nili ni ah Myanmar ram (Kawlram) le Leitlun pi ah remdaihnak hrang thlacamnak le rawlulhnak tuah dingah an sawm.
Myanmar ram (Kawlram) Catholic Bishop pawlkom a si mi Catholic Bishops’ Conference of Myanmar in March 26 ni Tlawngkai nili ni ah Kawlram pi hrang a hleice in thlacamnak le rawlulhnak ni tiah an ngamhnget ih zumtu pawl zaten tel in tuah cio dingah forhfial nak an rak nei.
“Pathian ih fale pawl” hnen tumtah in an ngan mi thuthannak ca pakhat ah Kawlram Catholic Bishop pawl pawlkom ih President a si mi Cardinal Charles Maung Bo le Conference’s Secretary General, Bishop Noel Saw Naw Aye pawl in harsatnak a tongtu Kawlram pi hrangah sawmnak an rak tuah.
Catholic Pawlpi hrangah a thianghlim mi Vua (Ulhnak tik cucaan) cu sualsirnak napi tuah caan, lungthleng caan le Pathian thawn naite ih pehtlaih dingah zuamnak caan a si” tiah Kawlram Bishop pawlkom pawl ih President a si mi Cardinal Charles Maung Bo le Conference’s Secretary General, Bishop Noel Saw Naw Aye in an langter.
Cuihlei ah hi tikcu caan cu Catholic zumtu pawl ih thlacamnak, rawlulhnak le zaangfah lainatnak thawn mai neih mi hlawmnak ah tel ding tikcu caan khal a si thu telh in an rak than.
Bishop pawl in a hleice in nisuahnak a laifannak hmun le Kawlram hrang remdaihnak thlacam dingah a tul thu pehbet in thupit in an rak sim.
Kawlram Catholic Bishop pawlkom Catholic Bishops’ conference of Myanmar in zumtu khawhhran mipi pawl hnen “Pathian in Leilungpi le Kawlram pi ah a diahnak a pek theinak dingah le khat le khat theih thiamawknak, lungrualnak a than a um theinak dingah thlacam dingah an rak sawm.
Bishop pawl cu a hleice in zumtu pawl hnen Francis of Assisi ih remdaihnak thlacamnak kha mangsal in cam dingah khal an rak sawm. Cuihlei ah rawlulhnak in “Jesuh Khrih” ih zonzaih harsatnak thawn pehtlaih aw in mai harsatnak pawl kha thinlung thlengnak le lungrualnak hrangah ap dingah an rak forhfial.
Cuihleiah zaangfah lainatnak hnatuan (peknak) kha tuah cio dingah le “ farah harsa pawl le harsatnak tuartu pawl kha bomnak pe dingah, hlu dingah khal an rak sawm.
An sawmnak thuthannak ca ih a cemnak ah Kawlram Catholic Bishop pawlkom ih President Cardinal Charles Maung Bo le Secretary General, Bishop Noel Saw Naw Aye in remdaihnak hrang thla a camtu zumtu pawl hnen an thinlung tak in an lungawinak thu an langter.
Cuihlei ah “remdaihnak cu nitin nunramah duhdawtnak, zaangfah lainatnak le khat le khat thei thiam awknak thawn nun tlangnakin din a si” tiah Pope Leo XIV in khal ralrinnak a rak pek thu telh in an langter.
Hi mi thuthang cu Vatican thuthangin a remcang daan in kan ngan mi asi.
