Ziangruangah Vua tikcu (Lent) caan ih tlawngkai 5 ni ah sa kan ul? Bible sung ah teh cuti’n tuah ding timi a um maw?
********************************************
A tlun ih thusuhnak hi minung tampi ih buaipi mi a si theu. Thu sut tu khal an tam zet theu.
A si; Bible cun Vua tikcu sung tlawngkai 5 ni ah sa nan ei lo ding ti’n in ti lo. Cuti asile, hiti ih RC kawhhran sungtel pawl ih kan tuah mi hi Bible thawn a kalh-aw maw?
Bible in fiang zet ih in sim mi cu: Jesu Khrih cu tlawngkai 5 ni ah a thi timi a si (cf. Mt 27:62/ Mk 15:42/ Lk 23:54/ Jn 19:31).
Jesu Khrih cu tlawngkai 5 ni ih a rak thih ruangah cuih ni cu zumtu Khrihfa pawl hrangah ni sunglawi pakhat ah a rak cang. Tlawngkai 5 ni cu kan Bawipa Jesu Khrih ih thihnak in mang ter tu khal a si. Vua tikcu sung ahcun cuih Jesu Khrih ih thihnak hleice takih vun mangsal dingah Nu Pawlpi cun sawmnak le forhfialnak a neih mi a si.
Thil um dan vun thlir tikah, tuih san khalah puaipi pakhatkhat vun tuah cun tilva pawl in thah an tuar theu. Sa tel lo ngaingai ih puaituah timi a um lo ti sehla a sual lo mai ding.
Curuangah sa timi in lungawinak, nomcennak le puai timi a khihhmuh kan ti phah thei a si.
Cuihhleiah, hitiih sa ulhnak hi hlanlaipi ihsin Nu Pawlpi ih a rak hman mi a si. Nu Pawlpi cun sa ei hi nomcennak pakhat a si ti’n a rak hmu.
Curuangah a thuruah thiamnak hmangin Vua tikcu caan sung tlawngkai 5 ni ah sa ei ul dingih in rak zirh le forhfialnak a si.
Jesu Khrih in nangmaih hrangah a nunnak a pek ni ah nomcennak ih na hmanmi pakhatkhat hi na bansan thei pei maw ti’n Nu Pawlpi cun nang le kei in sawm sawn a si. Sa ei a thiang lo ruangah siloin, luangliamnak (supawknak/pekawknak) pakhat a si sawn.
Vua tikcu timi hi ei-in thuhla a si lo. Supawknak/pekawknak thawngih lang ter mi duhdawtnak thuhla sawn a si. Kan duh zet mi thil tha pakhatkhat kan vun supawk tikah Jesu Khrih ih a maksak mi pekawknak (a tuarnak)ah kan telpi ve timi langter tu a si.
Tlawngkai 5 ni ah Jesu Khrih ih pekawknak hngihlonak kan tuah ih Zarhpini ah nehnak in cosak mi kan sunloih.
Vua tikcu ih sa ei kan ulh hi Bible ih fial mi cekci cu a rak si lo nan, Jesu Khrih in zumtu pawl ih thlarau lam thansonak ding lamzin hmuh dingih thuneihnak a rak pek mi Pawlpi ih cin le daan in tuahsak mi ihsin a ra mi a si (cf. Mt 16:19).
Khat lei lam zawngih kan sim asile, Jesu Khrih in kan hrangah a nunnak a rak pekawknak hngilhlonak kan tuah ni ah kan nomcennak pakhatkhat kan sup-aw tinak a si.
Cule hitiih kan tuah tikah Jesu Khrih ih thihnak parih kan riahsiatnak siseh, kan sualnak ruangih sualcawhkuan kan pekawknak siseh, mah le mah ukawknak siseh, supawknak thawngih kan langter mi duhdawtnak siseh, midang hnenih tette kan khaan nak pakhat khal a si.
A ngan tu – Rev. Fr. David Kap Cin Mang
