February-15

Mithianghlim Faustinus le Mithianghlim Jovita pawl hi Italy ram, Brescia ih a rak um tu unau hnih te an si. An nih hi hlanlai ih Christian martyr pawl an si ve.

An unau hnih ten kumzabi pahnih lai ah ram uk tu Siangpahrang Hadrian in a hrem lai ih hremnak a rak tuar tu pawl an si.

Cu lai ah cun kum no te an rak si ih Faustinus le Jovita cu an Biaknak par ih an duhdawtnak ruangah an hmin a thang zet. An mah rori khal Christian an si nak hi an nuntuzia in an rak phuang.

An mah a tul tu pawl ih that nak tuah ak ah khat le khat an bawm aw ton theu. Faustinus cu Siangbawi a si ih Jovita cu Deacon a si. Milian, farah ti lo in hmun tin ah Pathian thuthangtha phuan an rak thok.

An mah le an mah cu mi tampi Pathian hnen hruai kir sal dingah an rak hlan aw. Ziangah tile cu lai hi hre awk caan a si ruangah tih phan hi a ol sam sawn. Asinain, Faustinus le Jovita cun ralkap pawl in Christia tampi an that ti an thei ko nain an rak tih lo.

Ram uk tu Siangpahrang in Faustinus le Jovita in ngamhuai zet in Bawi Jesuih thu an phuang ti a theih tikah thawnginn ah a thlak ih a rak hrem. A nih ruah nak ah cun hi vek ih hrem nak in Bawi Jesuih thu an phuan ngam nawn lo ding tiin a ruat.

Asinian, ram uk tu Siangpahrang ih ruahnak cu a rak sual thla. Puithiam pahnih in ziang tluk ih hrem nak an tuar hman ah Bawi Jesuih thuthangtha phuan nak hi an rak cawl dah lo.

Thla an cam ih an tuar mi harsatnak pawl cu Pathian hnenah an rak ap. Faustinus le Jovita in Pathian hrangah martyr ih thah an tuar ding a si hman ah raltha zet ih tuar ngam dingin tha an pe aw.

Thah an tuar ni tiang an unau hnih ten Bawi Jesuh an zumnak le an duhdawtnak an rak hmuh thei. An thih ni cu a cekci in theih a si lo nain, Pawlpi in zohthim tlak an si nak cu a ciing ringring a si.

Pathian in unau khat le khat an zum nak thu zir phah in sim awk nak ih khat le khat bawm awk ton nak hmuh hi a lunghmui zet. Kan nih khal St. Faustinus le St. Jovita vek in Bawi Jesuh kan duhdawtnak le a mah ah nung thei dingin khat le khat tha kan pe aw thei a si.