Pope Leo XIV in January 9, 2026 sunah Myanmar hrangah Vatican ih Benediction Hall pi sungih a thusim micu a tanglam vek in ka lo hlawm duh hai a si.
“March 2025 ih ttihnungza linghninnak ruangah le ei-in le hnipuan neih lo ruangah siseh thinphan thlattemnak phunphun ruangah siseh, harnak tampi a tongtu Myanmar hrangah thlaza ka cam a si. Hivek harsatnak ton caanah a ttul mi pawl in tthaten bomnak an ngah ciau theinak ding in daihnak lamzin le zatei thurel tlangnak hawl dingin ka lo forh duh a si. Mizapi hrang ih tthatnak ruahsannak le mimal ciar ih tthansonak ruat in ram hrangih hnattuan tu pawl in zuamsin a ttul.
St. Augustine ih in sim bangtuk in daihnak cu catbang lo ih thazaang le zuamnak thawn hawl a ttul. Ral doawknak in siatsuahnak a thleng ter. Curuangah daihnak um thei dingin cat loih thinsau le lungfual tei zuam tlang a ttul. A hleice in thihtheinak nuclear ral thuam neitu ram pawl in thinsau tei daihnak hrangih zuam tlang a thupi. US le Russia kar lakih tuah mi, mirang ttong in, “New START Treaty” timi nuclear ralthuam khamnak thurel catmi tla zoh ih nem hnget sal a thupi, tiah ka ruat. Ngaingai ahcun leiral thuam tuah tahrat ih ramkhat le ramkhat zuamawknak tuah sal rero hi leitlun minung hrangah ttih nung zet mi a si. Cun AI kan timi mirang ttong in “artificial intelligence” timi khal ralrin ttul zet mi pakhat a si. AI hi milai zalennak hrang le ttuanvo neihnak hrangah ralring ih hman thiam a ttul.”
Nan zaten New Year ih daihnak co hram uh.
Khrih ah,
Msgr. Andrea Ferrante
A lettu – Rev. Fr. Lucas Tha Ling Sum
