December-14
Thinglamtah ih Mithianghlim John cu kum 1543 ah Spain ram, Fontiveros khuate ah a rak suak.
A kum 20 ah “Thinglamtah ih John” tin Mithianghlim hmin a rak lakih Medina khuapiih um Carmelite kaing ah a rak lut.
“Harsatnak pakhatkhat tuar lo in leitlun ihsin I tlan ter siang hlah aw” tiah a nun sungah tu le tu thla a rak cam. Puithiam can nak a ngah hnu ah a fek zet mi Albert ih daan pawl le mah te lawng um nak zin kha thlun ding ti ruahnak caan a rak ngah.
Kum 1568 ah Avila khuapi ih Mithianghlim Teresa thawn mah te lawng um nak, tangdornak pawl thlun nak ding Yatih tlawng an rak din.
Cu tiih thlengawknak a um tikah cui tlawng sung um ciami hrekkhat pawl cu Thinglamtahih John par ah an thin a heng ih dodaltu tiah mawh an puh ih thawng an rak thlak.
Thawng inn ih a um lai ah “thlarau lam thawn pehpar mi Pathian hla tawite pawl” le “a nung ring ring mi duhdawtnak meisa alh” ti mi hla pawl a rak phuah.
“Zaanthim sung ih thlarau” ti mi hla in harsatnak pawl lakih kan thlen lo a si le Pathian ih a that nak ,a ruahnak le a fimthiamnak nan ngah lo ding tiah a rak ngan.
Voikhat ah cun Thinglamtahih John in dan a thlun lo tu Fr. Diego ih nun thleng nak dingah ralrinnak a rakpek. Asinan, cui Puithiam cu a nun thleng ding ai ah khuazakip ah a feh ih Thinglamtah ih John dodal in thuphan thu a rakphuang.
Curuangah Thinglamtahih John cu Ubeda ah a thawn ih kum 1591 ah cui khua ah a rak thi.
Thinglamtah ih John hi a nunnak liam tiang ih Pathian ih duh a zulh tu a si vek in kan nih khal nitin kan nunnak ah Pathian ih duhzawng ih a nung thei tu kan si thei nak dingah thla in cam sak aw tiin zaangfah bomnak dil tlang uh si.
