Innsungsang farah ter tu thil phun (5) a um.
- Inn tlun khuh him lo mi Inn
Inn pakhat ah a tlun khuh a him lo ahcun ruahti a zun ding. Harsat an tuar ding. Hi vek thotho a si. Inn tlun khuh thawi a bang aw mi nu le pa san tlaih lo nak inn cu an farah ding a si.
Pa cu zu in rero in a nuam aw men ding. Nu cu cemral ding lawng a hawl rero tu inn an farah lo ahcun zawi inn hman an farah nawn lo ding a si.
- Coka him lo mi Inn
“Paisa cem thok nak cu coka” an ti vekin inn pakhat ah paisa cemnak a tambik nak hmun cu coka a s. “Ei le in, sin le fen, umnak hmun” himi pathum khal ah ei le in cu hmaisabik ah a um a si.
Sin le fen kan nei lo a sile neih sun in mawi tei hruk a ngah.
Umnak ding hmun ziangti tluk ih a siat a si khal le itnak hmun tia te a um le a sinpi a si.
Asinan ei le in kan neih lo ahcun um a ngah lo.
Curuangah coka cu paisa cemnak bik a si khal a tul ko.
Hiti vek ih paisa cem nak bik hmun a si mi coka cu thate le fel teih tawlrel lo a si le cui inn cu a farah ding a si.
- Innsungsang ah zianghman tuah lo ih a um aw ter tu um nak Inn
Kan pi le pui san lai ahcun pa bik ih paisa a hawl le innsungsang zate hrang ei in an rak daih thluh.
Tuisan thil man thawn a si le hithu pawl cu thuanthu men ah an cang.
Tuisan ahcun inn ih a um tu zate ih sum an hawl thluh hmanah daih aw fangfang in kan hmang.
Hivek san laiih hngal tak le puar tak ih nu le pai hawh mi a ei rero tu pawl, u le nau ih hlawh man kha hmaisong lo ih a cem rero tu pawl an um thei a si.
Hivek minung um nak inn khal an lian ding a har a si.
- U le nau lungrual lo nak Inn
U le nau cu an nei. Hnatuan khal mah vek an nei cio. Asinan pakhat le pakhat hmaiton ih an biak awk, an ton awk caan tinten el aw, lungrual lo mi inn cu thanso ding a har a si.
- Innsang ih rukru um nak Inn
Tih a nungbik mi rukru cu innsang ih rukru hi an si. Hmundang ihsi a ra tu rukru cu a caancaan lawng ah na inn kha an lo bih ding asinan innsang sungih rukru cu ruk ding lawnglawng a lo bawh ding a si. Hnatuan nei lo, sumlut nei lo mi cu innsungsang ih rukru a si.
Cuvek minung pawl cu hna le thaten an tuan peih lo, hna an tuan lo tikah sumlut khal an nei lo, sumlut an neih lo tikah paisa an tul caan ahcun inn ih um mi thilri, sumpai pawl kha khuimi ka lak ding, khui mi ka fir ding tin a bawh ringring tu pawl cu innsang ih rukru a si.
Hiti vekih innsang rukru um nak inn khal an farah tengteng ding a si.
Hipawl cu innsungsang pakhat a farah ter tu phun (5) pawl an si.
Ka rual na inn ah hi thil pawl a um a si le zamrang ten tawlrel dan ngaih tuah aw tiah ka lo forhfial duh a si.
Kan ram cu farah ram ah kan tel. Ziangruangah kan ram a farah ti a si le kan inn tlun khuh a him lo ruangah a si.
Credit to owner with respect
