Catholic actor (lemcang thiam) hminthang Michael Iskander in Catholic Biaknak ih a thawnnak cu Pathian ih kawhnak lehrulhnak a si tiah sim. ( October 30, 2025)
Michael Iskander cu Prime Video suahtu hminthang zet mi House of David video ah David Siangpahrang dinhmun in lemcangtu a si ih tui kum thok lamah a mah ten Catholic biaknak ah a tthawn thu a rak sim. Thei dan vek a si le a mah cu Egypt ramah a suak ih a nauhak lai ah America ramah an rak vai. Michael Iskander cu Coptic Orthodox zumnak in a rak suak ih hi biaknak ah reipi an um ko nan a mai sinak kha el si lo in Pathian ih kawhnak parah lehrulhnak a si tiah a rak sim.
Kum 24 a si mi Iskander cu October thlaah Catholic News Angency (CNA) thuthangah a lenglam men si lo in a mahih a tui a thlengawknak thawn pehpar mi zumnak a si thu a rak sim. A mai Catholic Biaknak ih a lung a thlengnak ih a thawhnak cu kan dung kum rei deuh zo ah Manhatan ih St. Patricks Cathedral Biakinn pi ah rin lo pi ih a rak luhnak in a thok tiah a sim. Cutikah a lenglam mi minung tampi an ra ko nan a mah cu biakinn sungih tokham ah to in Lukuun phah in a mah le Pathian cu an mah pahnih lawng biakinn sungih um vekin a rak thei aw.
Asimnakah Pulpit ih Eucharist (Bawipa thi le sa) a um lam kha a rak thei. “kei in Eucharist ( Bawipa thi le sa ) kha ka duh” tiah ka ruat ih cu mi minutes malte sungah ka thinlungah thinghlim zet dinhmun ruahnak pakhat ka rak nei. Ka Luu ka kun ih nazi pakhat sung rori ka rak tap. Thlacam tla ka si lo cu tin ka rak tap. Ka thinlung sungah keimah le Pathian lawng um vekin ka rak ruat tiah asim.
Cu mi ni cu a mai Catholic biaknak parah ngaihsaknak hrampi ah a rak cang. Cuihnu ah a mah cu Missa raithawinak ah a tel ih House of David lemcannak Video hrangah David Siangpahrang ih thu a rak zinzawi laiah a mai zumnak le kawhnak cu a rak tum zet. Season 2 Video a zuk hnuah a mah cu a umnak kiangih Puithiam pakhat a rak pehtlaih ih Pawlpi ih thu a rak zingzoi. Nazi pahnih hrawng an rel tlang hnuah a nih in “Catholic Biaknak ah ka thawn duh” tiah a rak ti.
Curuangah Catholic Pawlpi ah Michael Iskander cu August 21, 2025 ni ah Missa raithawinak ah a zumnak a langternak (profession of Faith) a rak tuah.
Cui Missa raithawinak sungih a lamdang hleice mi pakhat cu Puithiam in Saam 89 a rak siar ih cui Saam hla ah David Siangpahrang sahriak hnuh a si thu a tel taih a sim. Hi thu cu Catholic news angency in kan ngah mi a si. hi thuhla cu EWNT thuthangah fakim zetin zoh a theih tiah an tarlang.
