Pawlpi Cu Kan Nu le Kan Saya
429. Ziang vek in Pawlpi in zumtu ih ziaza ṭhatnak ding hrangah tha a pe?
Pawlpi kan timi cu hmunkhat ih um mi milai pawlkom a siih cu mi sungah zumtu in Pathian ih Ṭongkam, Khrih ih zirh mi daan (cf. Galati 6:2) le sacrament pawl in zaangfah lainatnak pawl a cohlang a si. Zumtu pawl cu Missa Raithawinak ah an komkhawm aw a si. An ziaza cu thlarau ih hnaṭuan mi a si. Thianghlim Mary le mi thianghlim pawl hnen ihsin thianhlimnak nuncan ziaza an zir a si.
430. Ziangruangah Pawlpi ih Thuzirh Theinak Anaa (Magisterium) in nuncan ziaza thawn pehpar aw in thil a tuah ṭheu?
Pawlpi ih Thuzirh Theinak Anaa in zum ding mi le nitin nunnak ih tuah ding mi thu phuang dingin ṭuanvo a nei a si. Himi ṭuanvo cu nitin ten milai nunnak daan sung tiangin thlen ter a si. Ziangruangah tile hi vek ih tuah le ṭuan cu rundamnak hrangah a ṭul mi a si.
431. Pawlpi thukham (precept) ih tumtah mi cu ziang a si?
Pawlpi thukham panga pawl cu zumtu pawl in thlacamnak, sacrament nunnak le nuncan ziaza ṭha neihnak in Pathian duhdawtnak le innhnen duhdawtnak ih an ṭhanso thei nak ding hrangah thukam a si.
432. Pawlpi thukham cu ziang tla an si?
Pawlpi thukham panga a um. Cumi pawl cu:
(1) Zarhpi ni le ni thianghlim ni pawl ah Missa sumnak ih tel ding;
(2) Kumkhat ah a malbik in veikhat sualthlah ding;
(3) Thosal caan ah Missa saan ding;
(4) Sa ei ulh ni le rawl ei ulh ni ah sa le rawl ulh ding; le
(5) Mah le ti thei tawk in Pawlpi bom ding timi pawl an si.
433. Ziangruangah zumtu ih nuncan ziaza cu Thuthangṭha phuannak ah a ṭul tengteng?
Ziangruangah zumtu ih nuncan ziaza cu Thuthangṭha phuannak ah a ṭul tengteng a si tile zumtuih nun cu Bawi Jesuh ih nun dan thawn a rem awih zumtu pawl in midang pawl cu Pathian zumnak ah le Pawlpi dinnak ah an hruai thei a si. Cun leitlun hnenah Thuthangṭha ih duhdan an sim thei ih Pathian ih Uknak ram thleng thei lohli dingin an ṭuan thei a si.
