Ziazaṭha Daan
415. Ziaza daan cu ziang a si?
Ziaza daan kan timi cu Pathian ih Fimthiamnak ih hnaṭuan mi a si. Pathian thawn a kalh aw mi lamzin a dawnih thil tuah daan ding lamzin le daan pawl a khihmuh.
416. A thok ihsin um cia mi ziaza daan cu khuitawkah a um?
A thok in a um cia mi ziaza daan cu Sersiamtu in milai thinlung sungah a ret ih Pathian ih ṭhatnak le fimnak sungah a um. Milai in a sia le a ṭha ṭhentheinak ruahnak cu a thok ihsin a nei. Curuangah hi ziaza cu milai ih thilti theinak le ṭuanvo neihnak a si. Culawng siloin pawlkom le a cozah ih ṭuanvo le thilti theinak khal a si ve.
417. A thok ihsin a um cia mi ziaza daan kan timi hi misenpi in kan theithei maw?
Sualnak ruangah mizakip in hi daan cu cat loin kan theithei lo a si. Cun kan thei khal a si le kan thei daan le kan thei zat a bang aw thei lo. “Milai in an thinlung sungih a um mi daan pawl an siar lo ruangah Pathian in lungto parah Daan a ngan a si” tiah mi thianghlim Augustine in a sim.
418. Daan hlun cu ziang a si?
Daan hlun cu hmasabik ih phuansuah mi daan a si. Himi daan cu Thukham pahra kom a siih milai ih kawhnak hrampi a si. Pathian duhdawtnak le innhnen duhdawtnak thawn a kalh aw mi pawl cu a kham ih milai thlun ding thil thupi pawl a sim a si.
419. Milai rundamnak ah Daanhlun in ziang tin hna a ṭuan?
Daanhlun in milai cu a dik mi tampi thei dingin a bawmih tuah ding le tuah lo ding tivek pawl khal lam a khnih hmuh. Milai in thuthangṭha cohlang thei dingin le sualsir thei ding in a bawm. Asinan, Daanhlun cu a famkim ngaingai lo. Ziangruangah tile Daanhlun in Thlarau ih zaangfahnak le thacahnak a pe thei lo.
420. Daanthar lole Thuthangṭha ih Daan kan timi cu ziang a si?
Daanthar lole Thuthangtha ih Daan kan timi cu Khrih ih phuansuah mi le famkim ter mi a siih Pathian ih daan le phuanmi daanih famkimnak a si. Hi daanthar cu a tawizawngin Pathian duhdawtnak le innhnen duhdawtnak a si. Cun Khrih ih in duhdawt bangtuk ih midang duhdawt ding timi a si. Cubangtuk ih duh thei dingin pek mi Thiang Thlarau ih zaangfahnak laksawng a si. “Zalennak daan” (Galati 1:25) khal a si. Ziangruangah tile duhdawtnak thawn hnaṭuan dingin a forhfial ringring ruangah a si. “Daanthar cu Thlarau Thianghlim ih laksawng a siih Khrih sungah zumtu pawl pek an si” (St. Thomas Aquinas).
421. Daanthar cu khawi tawkah kan hmu thei?
Daanthar cu Khrih ih nunnak ah le a sim mi thuthangṭha ah kan hmu thei a si. Cun Dungthluntu pawl ih zirh mi ziaza thu sung khal ah kan hmu thei. A bikin Jesuh ih tlangpar ih thuthangṭha a sim mi sungah fiang ten kan hmu thei a si.
