Milai Khawsaknak ih Telvenak
405. Pawlkom ih thu neihnak hrampi cu ziang a si?
Milai pawlkom tin ziang kim ṭhaten a um theinak dingin siseh milai ṭhatnak ding hrangih tumtahmi ṭuan suaknak ding hrangah siseh a dikmi thu neihnak a um tengteng a ṭul a si. Cuih thu neihnak ih hrampi cu milai um dan ah a ṭhum aw a si. Zianghrangah tile Pathian ih tuah mi daan thawn pehpar awknak a neih ruangah a si.
406. Ziangtikah thu neinak cu dik tein hman a si?
Acozoh in milai ṭhatnak ding hrangah a tuah ih a tuah dan khal a dik a si le thu neihnak cu dik tein a hmang tinak a si. Curuangah acozah cu mipi in zalen zet ih hril mi a si a ṭul. Daan cu mi hmuahhmuah in upat a ṭul. Asinan a dik lo mi daan cu thlun a ṭul lo.
407. Mizapi ṭhatnak kan timi cu ziang a si?
Mizapi ṭhatnak kan timi cu miburpi hrangah siseh mimal hrangah siseh ṭhatnak co thei dingin a bawmtu dinhmun khi a si.
408. Mipi ṭhatnak kan timi ah ziang pawl an tel?
Mipi ṭhatnak kan timi sungah:
(1) Milai thuneih theinak upatnak le ṭhansonak;
(2) Thlarau le leithlun thilri pawl mimal hrangah siseh pawlkom hrangah siseh ṭhansonak;
(3) Misenpi hrangih daihnak le kilvennak pawl an tel a si.
409. Mizapi ṭhatnak cu khawi tawkah famkim theibik in kan hmu thei?
Mizapi ṭhatnak cu mi senpi ṭhatnak a humhim tu le a ṭhangso tertu lawng siloin leitlun rampiih a um mi milai pawl ih ṭhatnak ding hrangkhal ruat le tuah tu rampi uknak pawlkom ah famkimbik in kan hmu thei a si.
410. Mipi ṭhatnak hrangah ziang tin kan tel thei?
Mah le umnak ciarah daan kan upat le kan thlun ih mah le ṭuanvo, ṭhimnak ah, inn sungsang ṭhaten kan zoih hna ṭhaten kan ṭuan a si le mipi ṭhatnak hrangah kan tel ve a si. Zozo khal in a cang theibik in mipi ṭhatnak hrangah thatho zet ih ṭuan a ṭul a si.
