Thuthangtha simtu – Rev. Fr. Joseph Ro Nei Thang
Caantluang Zarhkel (29) nak, Nithum Ni,
October 22, 2025
Bawi Khrih ah duhdawt zetmi nu le pa, u le nau pawl, kan Bawipa Jesu Khrih hmin in cibai ka run lo buk. Tuihni cu kumkhat sungih caankel kar 29 nak, Tlawngkai ni 3 ni asi. Cule tuihni cu October ni 22 ni asi vekin St John Paul ih puaini tla asi. Curuangah John Paul hmin latu hmuahhmuah nan zatein Happy feast day tiah ka run lo cibai hai. Tuihni kan siar dingmi Cathianghlim pawl cu Rome cakuat 6:12-18 tiang; Ps 124:1-8 tiang le Thuthang ttha siarnak ahcun Luka 12:39-48 tiang ansi pei. Tuihni ahhin “Sualnak le Zaangfahnak” timi kha ruat khawm tlang uhsi.
U le nau pawl, tuihni ih Cathianhlim a voikhatnak hi lakin thlarau tha zaang lak cio uhsi. Rome 6:12-18 tiangah Taksa hiarnak nan thlun lonak dingah a thi theimi nan taksapum cu sualnak in uk hlah hai seh. Nan taksatthen ziang khal thil tthalo sual tuahnak ah nan hmang lo pei. Cuhnakin thihnak ihsin nunnak ih thawhtermi bangin nan ziangzongza hi Pathian hnen ah pe aw sawn uhla nan nunnak zate thawn thil ttha tuahnak ah hmang sawn uh. Sualnak cu a lo uktu bawi si nawn hlah seh; ziangahtile daan hnuai ah nan nung nawnlo. Pathian zaang-fahnak hnuai ah nan nung zo asi. Cutin asile ziangtinso asi ding? Daan hnuai ih um loin Pathian zaangfahnak hnuai ih kan um ruangah sual kan tuah hrih ding maw? Tuah hrimhrim hlah! Nannih in mi pakhatkhat hnenah a sal si dingin le a thu ngai dingin nan pe aw asi ahcun cuih a thu nan ngaimi cu nan bawi asiih nannih cu a sal nan si ko. Cucu fiang zetin nan thei zo asi. Sualnak ih thu nan thlun asile sualnak ih a suahpimi cu thihnak asi ruangah thihnak nan tuar ding; asinain Pathian thu nan thlun ahcun Pathian thu thlunih a suahpimi cu remnak asi ruang ah Pathian thawn rualremnak nan co ding. Sikhalsehla Pathian hnenah thangtthatnak um ko seh! Ziangahtile nannih tla cu sualnak ih sal nan rak sidah nain a tu ahcun zirhnak nan ngahmi sungih thudik kha nan thinlung zate in nan thlun zo. Sualnak ihsin luattermi nan siih dingnak sal ah nan cangzo asi. Himi cu Bawipa ih ttongkam asi.
Duhdawtmi u le nau pawl, tuihni kan siarmi Cathianghlim a voikhatnak ahhin Paul in Rome khawlipi sungih ummi Christian pawl ca a kuatnak ihsin kan siar asi. Kan thei a ttul zetmi cu Rome miphun pawl cu leiltun daan ahcun miphun saang pawl ansi, bawi phun ansi. Annih in sal tampi an nei. Curuangah Paul in Rome khua ah ca a kuat tikah sal ih umdaan le miluat ih umdaan hi a telhih an thei thiam. Curuangah sualnak kan tuah tin tein sualnak ih sal kan cangih kan co dingmi cu thihnak asiih Pathian thu kan thlun ahcun remnak kan co ding, cumi cu Pathian thawn rualremnak asi tiah Rome cakuat 6:16 ah in zirh asi. Sualnak kan tuah tikah sualnak in in ukih thi dik, thil ttha kan tuah tikah Pathian in in uk asi. Curuangah sualnak ih uknak sal ihsin luatnak in petu Bawipa Jesu Khrih ih sal si dingah zuam thlang uhsi. Amah rian ding timi cu amah ih sal si dingin kan hril tinak asi.
U le nau pawl, tuihni ih kan siarmi Cathianghlim a voikhatnak ihsin “Sualnak le Zaangfahnak” timi hi kan hmu thei. Sualnak hi phun hnih an um vekin Zaangfahnak tla phun hnih an um ve. Sualnak phun hnih pawl cu sual hrampi le mai tuahmi sualnak tiah asi. Mai tuahmi sualnak tla sualpi le sualte tiah phun hnih in kan tthen bet lala. Sualpi timi cu thihpi tlak sualnak tiah 1Johan 5:16 in sim. Cun Zaangfahnak tla phun hnih an um kan ti tikah Thianternak zaangfahnak le bawmnak zaangfahnak tla ansi. Mirang ttong in Sanctifying grace timi le actual grace tiah kawh asi. Thianternak zaangfahnak cu Pathian in a nunnak in hlawmnak hi asiih cumi cu Pathian in in serhsiam lai ah in pe zo mi asi. Asinain Adam le Eva ih sualnak ruangah Pathian nih in hlawmmi nunnak cu an nei nawnlo, an hlo ter. Curuangah minung in Pathian ih hlawm mi nunnak a nei nawnlo ruangah thihnak kut sungah an tlak, sualnak kut sungah kan tla ih sualnak ih sal ah kan cangta. Cumi dinhmun ihsin Bawipa Jesu ih zonzai tuarnak, a thih tuarnak le a Thawhsalnak thawngin a cuih nunnak cu in ngah sak sal asi. Amah kan zumih baptism kan ngahnak thawngin kannih hi Pathian nun hlawmtu ah kan cang sal asi. Cumi nunnak hi sualnak kan tuah tikah a hlo sal thei ruangah bawmnak zaangfahnak timi hi Pathian in in pek asi. Kan tlak ruangah silo in in zaangfah ruangah in pek asi. Tiduhnak cu Pathian ih fa le ah kan hmun ringring theinak dingah a bawmnak zaangfahnak in pek asi. Pathian ih fa le timi cu Pathian ih nunnak a hlawm ngahtu, rundammi fa kan sinak hi asi. Pathian in a serhsiammi minung pawl parah ziangtlukinso in duhdawt ti hi kan hmu thei. A nunnak a hlawmmi minung pawl hnenah cumi a hlawmmi nunnak hlo lo dingah tla Pathian in bawmnak zaangfahnak a pek hrih asi. Cuhlei ah kan sual ngah pangih cumi thianternak zaangfahnak hi kan hloter ngah pang asi khalle Pathian in in zaangfah thotho lai ih sualsir lungkuainak thawn puithiam hnenah va panin kan sualnak hmuahhmuah kan phuangih sual thlahnak kan dil asi ahcun kan sualnak pawl in thlahih amah Pathian thawn pumkhat kan rak cang sal thei asi. Ziangtlukinso a khuinh a yay ttha kan nei. Lungawi uhsi.
U le nau pawl, sualnak le zaangfahnak thu kan ruat tikah Rome 5:20 tla hngilh hlah uhsi. Cunah ziangtinso kan hmu thei: “Sikhalsehla sual a karhnak hmun ahcun Pathian ih zaangfahnak tla a karh sinsin ve” tiah asi. Kan sual nacing in Pathian in in zaangfah sinsin asi ti kha ruat uhsi. Asi ahcun Pathian in in ngaidam ko ding si tiah sualnak cu kan tuah hrim pei maw? Rome 6:15 ah “Tuah hrimhrim hlah” in ti asi. Tulai ih Christian tampi ih kan hmang sualmi, kan ruah sualmi le Pathian ih zaangfahnak kha a luaitungsatu pawlih nuncan asi ti kha thei cio uhsi. Pathian ih duhdaan in nung ding kan si sawn sokhaw. Mihrekkhat in “Pathian ih duhmi vek ciah in ziangtinso kan nung thei ding,” tiah anti ttheu. Pathian ih duhmi cu kan zuamnak hi asi. Zuam theinak dingah tla thazaang in pek thluh zo. Efesa 1:3-4 ah, “Kan Bawipa Jesu Khrih thawngin vancung thluasuah hmuahhmuah cu kan hnenah pek ttheh asi zo,” tiah in zirh asi. Tuihni kan siarmi Rome cakuat ah tla Paul in, “Nan nunnak zate thawn thil ttha tuahnak ah hmang sawn uh” tiah 6:13 ah in zirh asi. Curuangah kanmah le kanmah, ‘Ka ti thei uallo,’ tiah a khuan pek aw hlah uhsi. Kanmah le kanmah bum aw hlah uhsi. Cutin kan ti tikah Satan ih bumnak ah kan tel ngah zo, Satin in in bum ngah zo ti kha ruat ding kan siih himi turhforhnak ihsin luat theinak dingah thazaang suahin zuam cio uhsi. Curuangah Rome 6:12 ah Paul in, “Taksa hiarnak nan thlun lonak dingah a thi theimi nan taksapum cu sualnak in uk hlah hai seh. Nan taksatthen ziang khal thil tthalo sual tuahnak ah nan hmang lo pei” tiah in zirh asi. Pathian ih zaangfahnak hi kilkhawi cio uhsi. Sualnak ih tur cu do cio uhsi. Cuti cun Pathian ih zaangfahnak ruangah tlennak a ngahtu kan cang ding asi.
