Sual Thu
391. Pathian ih zaangfahnak ngah thei dingin ziang kan tuah a ṭul?
Pathian ih zaangfahnak ngah thei dingin misual kan si tiah thinniamnak le dangdornak thawi kan sual kan sir a ṭul a si.
392. Sual timi cu ziang a si?
Mi Thiangthlim Augustine in sual timi cu “Pathian ih daan thawn a kalh aw mi ṭongkam, tuahnak lole thinlungih duhnak a si” tiah a sim. Ṭongdang in kan sim a si le Pathian ih duhdawtnak cu thu ngai lonak ruangih pah siat mi khi sual a si. Sual in milai sinak cu hriamhma a nei terih milaiih pumkhat sinak le cahnak khal a siat ter a si. Khrih in sualnak cu ziangtlukih ṭihnung le thil ṭhalo a si ticu zonzaih harsatnak a tuarnak in a lang ter. Asinan, cuih ṭhihnung zet mi sualnak cu a zaangfahnak in a neh a si.
393. Sualnak a phunphun a um maw?
Sualnak cu sualpi lole sualte tin phunhnih a um. Cuih sualnak pawl cu Pathian thawn lole inn hnen thawn lole kanmah le kanmah thawn an peh par aw a si. Cun sualnak cu thinlungih sualnak, ṭongkam ih sualnak, tuahnak ih sualnak lole tuah lonak ih sualnak tiin kan ṭhen thei a si.
394. Sualnak cu ziangtivek in kan ṭhen thei?
Sualpi le sualte tiin sualnak cu kan ṭhen thei a si.
395. Ziangtik caan ah mi pakhat in sualpi a tuah?
Mi pakhat in:
(1) A tumzet lole a thupi zet mi cu,
(2) Thei aw cing rori in, le
(3) Thinlung ih duhnak le paihnak thawn a tuah hrim a si le sualpi a tuah a si tiah kan ti thei. Sualpi in kan thinlung sungih a um mi duhdawtnak a siat terih zaangfahnak lawksawng khal co lo dingin in tuah a si. Sualsir loih kan um a si le hell ramah in hruai a si. Hi sualpi cu Tihnimnak sacrament le Sualthlahnak sacrament ngahnak in Pathian in in thlah sak a si.
396. Ziangtik caanah mi pakhat in sualte a tuah?
Mi pakhat in thil tenau lole fate a tuah sual tikah sualte a tuah a si. Cun a thil tuah mi a tumpi lole thupizet nan famkim ten a thei fiang lo lole lungkimnak nei loin a tuah mi a si ah cun cuih a tuah mi sual cu sualte a si. Sualte in duhdawtnak tha a nem ter. Ṭhatnak tuah duhnak thinlung ṭha khal a nau ter a si.
397. Sualnak in ziangtin pehzomnak a nei?
Sualnak in sual tuah dingin a forh. Ṭhatlonak tuah cingcingnak in ṭhatlonak a cangter a si.
398. Nun can sia timi cu ziang a si?
Nun can sia kan timi cu ṭhatnak ih ral a si. Siatnak cu a tu le a tu thil ṭhalo tuah cingcing nak khi a si ih milai thinlung ruahnak a siatsuah ih thil ṭhalo tuah duhnak thinlung a nei ter. Hi siatnak kan timi pawl cu:
(1) Puarthaunak;
(2) Duhhamnak;
(3) Iksiknak;
(4) Thinhengnak;
(5) Tisa sualduhnak;
(6) Hrongnak; le
(7) Zaangzelnak tla an si.
399. Midang ih tuahmi sualnak thawn peh tlaih awknak kan nei maw?
Sualnak a tuah tu pawl phun khatkhat in kan bawm lole sual an tuahnak ah kan tel ve a si ah cun kan mah khal ṭuanvo kan nei ve a si.
400. Sualnak cu ziang tivek in an cang?
Pathian ih daan thawn a kalh aw mi milai dinhmun le umtudan pawl cu sualnak ih fehdan a si.
