Thuthangtha simtu – Rev. Fr. Joseph Ro Nei Thang
Caantluang Zarhkel (27) nak, Nithum Ni,
October 8, 2025
Bawi Khrih ah duhdawt zetmi nu le pa, u le nau pawl, kan Bawipa Jesu Khrih hmin in cibai ka run lo buk. Tuihni cu kumkhat sungih caankel kaar 27 nak, Tlawngkai ni thum ni asi. Tuihni ih kan siar dingmi Cathianghlim cu a voikhat siarnak ah Prophet Jonah 4:1-11 tiang, Ps 86:3-6, 9-10 le Thuthang ttha ahcun Luka 11:1-4 tiang pawl tla ansi pei. Tuihni ahhin Pathian ih zaangfahnak thinlung kha ruat khawm tlang uhsi.
U le nau pawl, tuihni ih kan siarmi Cathianghlim a voikhatnak ihsin thlarau thazaang lak cio dingah ka run lo sawm. Jonah 4:1-11 tiangah Cutikah Jonah cu a lung a awi lo ngai ngai; a thin tla a hengzet ih Bawipa hnenah, “Maw Bawipa, himi asi kan ram ih ka rak um lai ihsin ka phanmi cu! Hi ruangah asi a hlan khan in Tarshih khua ih tlan ka rak tumnak cu! Nang cu zangfah thiam le lainat thiam Pathian, thinsaumi le a hmunmi duhdawtnak neitu Pathian, misiatsuah a tum hmanah a sir aw sal ttheutu Pathian na si, ti ka thei. Maw Bawipa, ka nunnak la hram aw. Nun hnakin thih ka duh sawn” tiah thla a cam.
Cutikah Bawipa in, “Hitin na thin a heng hi a dik na ti maw si?” tiah a sut. Jonah cu khua sung ihsin a suakih nisuahnak lamah a feh hnu ah cunah a to. Cule a hrangah sawlhnah in deuthlam a sakih Nineveh khua parah ziang a ra thleng ding ti zoh tumin deuthlam sungah a to. Bawipa Pathian in uum a khoterih Jonah phentu dingah le a harnak nuamter deuh dingah a tlunah a zaamter. Cutikah uum ruangah Jonah cu a lung a awi ngaingai. Sikhalsehla a thaizing zingpit ah Pathian in uum hri cu sunhrul a eiter ih a vuai cih. Ni a hung suah tikah Pathian in nisuahnak lam thlisa a hranter. Cule ni in Jonah ih lu a em ruangah Jonah a lung a mitih a sawn ciamco. Jonah cun thih a dilih, “Nunhnak in thi ka duh sawn,” tiah a sawn.
Cutikah Pathian in Jonah hnenah, “Uum ruangah hitin na thin a heng hi a dik na ti maw si?” tiah a sut. Jonah cun, “Thih ngamin ka thin a heng hi ka dik ko asi” tiah a sawn. Bawipa in, “Zankhat sungah a kho ih zankhat sungih a vuai ttheh salmi na phun lo mi le na tuhlomi uum hri hrangah zaangfahnak na nei. Cuti asi ahcun hi a nasa zetmi Nineveh khua, kehlam kut le vorhlam kut hman a thleidang thiam hrihlotu minung thawng zakhat le thawngkul umnak le ttilva tla siar cawklo umnak hi khawpi hi zaangfah lo in maw ka um ding,” tiah ati. Himi cu Bawipa ih ttongkam asi.
Duhdawtmi u le nau pawl, Prophet Jonah in nganmi Cathianghlim kan zoh tikah thu lamzang zetmi pawl kan hmu thei. Ziangmi pawl so kan hmu thei? 1) Pathian ih thupekmi ngai duhlo in rak tlanhlo tumtu Jonah ih thu in sim. 2) A thusim dingmi pawl tla Israel miphun pawl silo in Assyria ram, Nineveh khuami pawl hnenah ralrinnak pek dingah a thlah asi. 3) Pathian ih thinlung le milai ih thinlung a bang awlonak pawl kan hmu thei. Pathian ih zaangfah zawn ruahnak le milai ih lehrulmi hmu duhnak thinlung pawl kan hmu thei. Pathian in Nineveh khawmi pawl parah zaangfah zawnruahnak a neiih an parih cawhkuan a pek tummi pawl a pek sal lo. Khami Pathian ih pek tummi cawhkuan kha prophet Jonah in a hmu duh. A hmu ngah lo ruangah a thin a heng bet lai.
