May 22-29 tiang tuah ding mi Pope ih Laudato si tharthawh ding mi thansonak sunloihnak hrangah thawng za leng lo mi Catholic mipi pawl cu an lungrual dingih Dicastery ih khaisan mi Laudato si Action Platform ihsin an zuam nak pawl an khaisang ding. Pope in sersiam mi thawn pehpar mi kilhimnak lam kum sarih kim caanserh pawl ah thatho mi tongkam pawl a tel dingih tthenkhat pakhat a si mi cui hmun mipi pawl ih aw thawm pawl khaisannak, kiangkap kilhimnak par sunsak tu Dicastery secretary, Sr. Alessandra Smerilli FMA tla a tel ding.
Pope Francis in kiangkap kilhimnak par a hmuh daan a langsar ter ding mi Pope Francis a tel nak film thar pakhat The Invitation ih hmaisabik mipi pawl zohkhennak khal an tarlang ding. Leitlunhuap le cui hmun thil cang pawl cu Laudato si zarh ih nitin te ah Laudato si ih tumtahnak pasarih sungin pakhat le Laudato si Action Platform ih thensarih thawn pehpar mi leitlunhuap thawn pehpar mi, cui hmun le an puai pawl an tarlang dingih a zate in pawlkom daan ih thu um daan hram a bun.
Laudato si zarh sung zir tul mi a thupi mi thuhla pawl cu Catholic kohhran mipi pawl in kiangkap thentheknak pawl, tluksiatnak ziang tin do a theih ding; buainak pawl le nikhua harsatnak ah zinaan lam, kan zaten kan nunram ah ziangtin kan cohlang ding timi thuluu thawn pehpar in an zingzoi ding. Uganda, Italy, Ireland, Brazil le Philippines ram pawl khal ah leitlunhuap thawn pehpar mi caanserh pawl a um ding.
A ralai ding mi zarh ah Laudato si cangvaihnak hotu director Tomas Insua in Laudato si zarh cu kan ruun innpi hrangah hleice ih tuah dingah rinumnak taangta in leitlunhuap thawn pehpar mi caanserh pakhat a um tiah a rak sim. “Leitlunhuap remdaih lonak le siatralnak pawl ruangah nitin ten Catholic mipi pawl cu nikhua siatnak dinhmun le kiangkap harsatnak pawl an dodal rero. Laudato si zarh cu Pathian ih sersiam mi run dingah thinlung duhnak a nei tu zate hrangah thangphawknak le zirhnak pawl zir thei ding mi tlaser pakhat vek a si” tiah a rak sim bet. Dicastery in Laudato si Action Platform ihsin sim mi kumsarih rei khualtlawnnak cu Laudato si zarh ih tel dingah kawhnak ah an tel ding tiah ruahsannak a nei.
Hi thuthang cu RVA thuthang ih kan ngah mi a si.
