283. Mirang ṭong in “transubstantiation” kan timi cu ziang so a si?
Missa sumnak sungah sang cu Khrih ih Pumpi ah a cangih sabit ti khal Khrih ih Thi ah a cang. Cutivek ih a thleng awknak cu mirang ṭong in “transubstantiation” tin kan ko. Himi cu Missa sumnak sungih hman mi Khrih ih Ṭongkam le Thiang Thlarau ih cangvaihnak ruangin a cang a si. Asinan, mit ih kan hmuh thei mi sang le sabit ti ih pian zia cu ziang hman a thleng aw lo.
284. Sang cu phel a si tikah Khrih a ṭhek aw maw?
Sang phel ruangah Khrih a ṭhenṭhek aw cuang lo. Khrih cu famkim zetin sang lole phel mi sang sungah siseh sabit sungah siseh kim ten a um a si.
285. Ziang caan tiang Khrih cu Missa sungah a um?
Khrih cu Missa sinak lole sang sinak a siat ral hlan lo tiang Missa sungah a um a si.
286. Ziang vek biaknak hi Missa hrangah a ṭhabik?
Mirang ṭong in “adoration” kan timi Pathian biaknak hi Missa hrangah a tlak le a ṭhabik a si. Pawlpi in Bawi Jesuh ih Thi le Sa cu nasa zetin a kil khawi a si. Midam lo le Missa sumnak sungih a tel thei lotu pawl, ṭhimnak ah thawnginn sungih um tupawl, hnenah Missa cu pek an si ṭheu. Pawlpi in zumtu pawl cu Missa kuang (tabernacle) sungih a um Missa hnenah feh ih thlacamṭheu dingin tha a pe a si.
287. Ziangruangah Missa cu paska zanriah tin kan ko?
Missa cu paska zanriah a si tin kan ko. Ziangruangah tile Khrih in a maih lantakpuai cu a hmun terih a maih Pumpi le Thisen cu kan thlarau hrangih in ding le ei dingah in pek. Cun amah thawn in kom aw terih a maih sumnak ruangin pakhat le pakhat khal in kom aw ter a si.
288. Thianghlim cabuai kan timi cu ziang ti can a si?
Thianghlim cabuai kan timi cu Khrih ih hminsinnak a si. Khrih cu sum mi le kan hrangih pek mi vangcung ihsin a ra mi kan thlarau rawl a si.
289. Ziang tik caanah Pawlpi in Missa sumnak sungih tel tengteng dingin in forh?
Pawlpi in nipi sun tinte le puaipi ni tinten Missa sumnak sungah tel tengteng ding in in forh fial a si. A dang ni pawl khal ah Missa sumnak sungih tel dingin Pawlpi in tha in pe thotho a si.
290. Ziangtikah so Missa kan sang thei?
Pawlpi in Missa sumnak ih kan tel tinten, Missa sangtlak ih kan um a si le, Missa sang dingin in forhfial a si. Asinan, kumkhat sungah veikhat tal Easter caan sungah, Missa sang tengteng dingin in zirh a si.
291. Missa sang thei dingin ziang mi pawl a ṭul?
Missa sang thei dingin Catholic si a ṭul. Cun thianhlimnak sungih um khal a ṭul. Ṭongdang in kan sim a si le Missa sang tu ding nu lole pa cu sualpi sungah um lo ding. Sualpi a neitu cu Missa sang thei dingin sualthlahnak a tuah hmai sa a ṭul a si.
292. Missa ih ṭhatnak pawl cu ziang an si?
Thianghlim Missa in Khrih le Pawlpi ih pehzom awknak a karh ter sinsin a si. Tikholhnak le Christmas Thapeknak kan ngah laiih kan ngah mi zaangfahnak nun cu Missa in a thar ter sal ih inn hnen pawl duhdawtnak khal a karh ter a si. Duhdawtnak sungah in ṭhangso ter. Cun sualte pawl ngaidam an siih sualpi sungih tla lo dingin in humhim a si.
293. Ziangtikah Khristian dang pawl Missa pek theih an si?
Oriental Pawlpi sungih a um mi pawl in an dil ih a ṭul mi timtuahnak an nei a si le Missa pek theih an si. Cun Catholic asilo mi Khristian pawl khal in Missa sang dingih an dil le cun ral rinnak le timtuahnak famkim an tuah a si le, cun sacrament pawl thawn pehpar aw in zumnak an neih a si le Missa pek theih an si.
294. Ziangruangah Missa cu hmailei ih sunlawinak ih thukamnak a si kan ti?
Missa cu hmailei ih sunlawinak ih thukamnak a si. Ziangruangah tile Missa in zaangfahnak le thlawsuahnak in pek ringring ruangah a si. Thlaraulam ih khual kan tlawnnak hrangah thazaang in pe ih kumkhua nunnuamnak khal co duhnak thinlung in pek a si.
