252. Tihnimnak sacrament pek tikah ziang hmin pawl pek an si?

Khristian canthoknak sacrament cu Tihnimnak sacrament tiah kan ko. Tihnim timi cu tidai sungih hnim tinak a si. Tihnimnak a ngah tu cu Khrih ih thihnak sungah hnim a siih Khrih thawn “a thar in” (2 Cor 5:17) a tho sal ding. Himi sacrament cu “hrinthar nak le Thiang Thlarau sungih thar salnak” (Tit 3:5) tikhal in kawh a si. Cun thleunak tikhal in kawh a si. Ziangah tile tihnimnak a ngah tucu “thleunak ih fa” (Eph 5:8) ah a cang.

253. Tihnimnak cu Thukam Hlun sungah ziangin khihhmuh cia a si?

Thukam Hlun sungah Tihnimnak cu phun tampi in a khihhmuh cia:

• Tidai cu nunnak le thihnak ih hramthoknak;
• Tidai ihsin runnak a ngah mi Noah ih lawng;
• Isarel pawl Egypt sal kutsung ihsin luat tertu Tipi Sen tannak;
• Kumkhua nunnak ih thlamzuk a simi Israel pawl kam cia mi ram a thleng tertu Jordan tiva kannak pawl an si.

254. Khihhmuh ciami pawl cang suak dingin zoin a tuah?

Thukam Hlun sungih khihhmuh cia mi pawl hmuahhmuah cu Jesuh Khrih ah a cang famkim a si. Jesuh in mipi hmai ih langngan ih hna a ṭuan thok hlan te ah amah le amah Jordan tiva ah Johan hnen ihsin Tihnimnak a ngah a si. Thinglamtah par ihsin Tihnimnak le Missa ih hminsinnak thi le tidai cu fei ih an sunnak a hnak ihsin a suak. A thohsal ṭheh hnunah Jesuh in a dungthluntu pawl hnenah rundamnak hnanṭuan a pek: “Khua zakip ah va feh uh la Pa le Fapa le Thiang Thlarau hmin ih tihnimnak peknak in ka dungthluntu va cang ter uh” (Mt 28:19).

255. Ziang tik in Pawlpi in Tihnimnak a pek thok? Cun zo pawl hnenah Tihnimnak a pek?

Pentecost ni (Thiang Thlarua a ṭum ni) ihsin Pawlpi in Jesuh Khrih a zumtu pawl hnenah Tihnimnak a pek a si.

256. Tihnimnak pek tikah ziang mi a thupibik?

Tihnimnak sacrament pek tik ih a thupibik mi cu Tihnimnak a ngah tu ding nu/pa cu tidai sungih hnim laifangah lole a lu parih tidai tawih lai fangah Pa le Fapa le Thiang Thlarau ih hmin kawhnak khi a si.

257. Tihnimnak sacrament cu zo pawl in an sang thei?

Tihnimnak sacrament a ngah hrih lo tu pohpoh in Tihnimnak an ngah thei a si.

258. Ziangruangah Catholic Pawlpi in naute Tihnimnak a pek?

Pawlpi in naute pawl khal Tihnimnak a pek a si. Ziangruangah tile naute pawl cu sual hrampi thawn hrin mi an si. Khuavang ih thilti theinak ihsin luatnak ngah a ṭul. Cumi luatnak an ngah in Pathian ih fate ah a cang.

259. Tihnimnak ngah thei dingin ziang pawl an ṭul?

Tihnimnak a ngah tu ding pohpoh in zumnak phuan a ṭul. Hi zumnak cu bul pak in phuan a si. Asinan naute pawl hrangah cun nu le pa le Pawlpi in zumnak an phuan sak. Tihnimnak sacrament a ngah tu dingih timtuahnak siseh, hmai lamih a ṭhansonak dingah siseh, zumnak le Tihnimnak a ngah lai ih pek mi zaangfahnak laksawng pawl siseh kilkhawi dingin lu kaitu nu lole pa le Pawlpi in ṭuanvo an nei a si.

260. Zo in Tihnimnak a pek thei?

A daan vek ih Tihnimnak a petu pawl cu bishop pawl le tlangbawi pawl an si. Cun deacon pawl khal in an pe thei ve. Asinan, a ṭultuk hrat a si ah cun zo vek khal in Pawlpi ih tuah daan vek in tumtahnak a nei a si ah cun Tihnimnak a pe thei. Tihnimnak cu Tihnimnak a ngah tu dingih lu parah tidai tawih phah in Bawi Pathum Pathian Pakhat hmin sal in hitin pek ding a si: “Pa le Fapa le Thiang Thlarau ih hmin in tihnimnak ka lo pe a si”.

261. Rundamnak ngahnak dingah Tihnimnak ngah a ṭul maw?

Pathian thuthangṭha a thei tu le Tihnimnak sacrament dil theinak caan a neitu pawl hrangah Tihnimnak cu rundamnak ngahnak ding hrangah a ṭul a si.

262. Tihnimnak tel loin rundamnak ngah theih a si maw?

Khrih cu mi hmuahhmuah rundamnak ngah theinak ding hrangih thi a si vek in Tihnimnak ngah lo hmansehla zumnak ruangih a thitu (Baptism of blood) pawl cu rundamnak an ngah thei a si. Tihnimnak ngah dingih tim a tuah rero tu pawl le Khrih le Pawlpi thei lo hman hai sehla thinlung sungih Pathian duhnak tuah dingih a zum rero tu pawl cu, Tihnimnak ngah lo hman hai sehla, rundamnak an ngah thei a si (Baptism of desire). Pawlpi in a sumnak sungah Tihnimnak ngah loih a thi tu naute pawl cu Pathian in zaangfahnak sungah a ap a si.

263. Tihnimnak sacrament ih ṭhatnak pawl cu ziang an si?

Tihnimnak sacrament in sual hrampi siseh, bulpak sualnak pawl siseh, sual cawhkuannak siseh, a kholhfai ṭheh a si. Zaangfahnak laksawng le dingfelnak laksawng in mi pakhat cu Khrih le Pawlpi sungah an lut ter. Tihnimnak sacrament in Tihnimnak a ngah tu cu Bawi Pathum Pathian Pakhat ih nunnak sungah a tel ter. Cun Tihnimnak a ngah tu cu Khrih ih tlangbawi sinak a ṭawm ter. Zumtu zate thawn hmunkhat sinak khal a cang ter ih ṭhatnak le Thiangthlarua ih laksawng pawl a co ter. Tihnimnak a ngah tu cu kumkhua in Khrih ih ta a si. Tihnimnak a ngah tu cu phiat theih lo mi Khrih ih tacik thawn hmin sin a si.

264. Ziangruangah Khristian hmin cu Tihnimnak ngah tu pek a si?

Hmin timi cu a thupi zet. Pathian in milai cu an hmin ciar in, lole, bulpak ciar in, a thei a si. Tihnimnak ngah tikah mi thianghlim pakhat khat ih hmin pek ding a si. Cuih mi thianghlim ih nuncan ziaza cu Tihnimnak a ngah tu/nu ih zoh ṭhim ding a si. Cun cuih mi thianghlim in Tihnimnak a ngah tu nu/pa cu Pathian hmaiah thlacamnak thawn a bawm thei a si.