247. Ziangruangah Khrih ih mangbangza thuthuk pakhat cu Pawlpi in sumnak a phunphun in a tuah?
Pawlpi in Khrih in mangbangza thuthuk pakhat cu phun dangdang in a tuah a si. Ziangruangah tile Khrih ih mangbangza cu theihcawk loin a tam ih sumnak phunkhat te men lawngin huap thluh in tuah a theih lo. Curuangah a hramthok ihsin theih cawk lo le sim cawklo in a khat mi Khrih ih mangbangza pawl cu mi dangdang le nunphun dangdang hnenah langter a si. Mangbangza dangdang an sinan pakhat le pakhat an bawm aw a si.
248. Biaknak tampi lak ih pumkhat le rualremnak si theinak tahfung cu ziang a si?
Remawknak um thei dingih a ṭul mi cu Dungthluntu pawl ih Thuanthupi kan timi, dungthlun tu pawl hnen ihsin a ra mi zumnak le sacrament pawl sungih hmunkhat sinak a si. Pawlpi cu leitlun zate huap a si vek in Pawlpi in nunphung a phunphun pawl cu a maih remawknak sungah a thunlut thei a si.
249. Sumnak sungih a um mi zaten thleng theih lo hlir an si maw?
Sumnak sungah, a hleice in sacrament pawl sungah, thlengtheih lo mi an um. Ziangruangah tile Pathian amah rori ih tuah mi an si ruangah thleng an theih lonak a si. Pawlpi cu cumi pawl kilkhawitu a si. Asinan, sumnak sungih a um mi hrekkhat pawl cu thleng theih an si. Pawlpi in miphun dangdang le nunphun dangdang pawl ih um dan thawn mil aw in sumnak sungih a um mi hrekkhat pawl cu thlengtheinak huham a nei.
