August 28, 2025
Thuthangtha sim tu – Saya Noel Tluang Bawi
RVA Falam tong in thuthangtha a ngai ringring tu zumtu u le nau pawl kan Bawipa Zesuh Khrih ih zangfah lainatnak cu nan zaten tlunah um hram seh. August 28, 2025 ih kan siar ding mi Bible bung cang pawl tla cu 1The 3:7-13, Ps 90: 3-5a, 12-14,17 le kan Gospel cu Mt 24: 42-51 tiang asi.
Kan Gospel kan siar mi cu hnen um fel le fel lo thu kan siar mi sung ihsin thazang lak tlang ding ka duh mi cu “ Rin lo lai caan ah” ti mi thu lu hmang in ruat khawm tlang seh lah. U le nau pawl kan Bawipa Zesuh cu kan rinlo lai caanah a ra ding. Mithianghlim pawl in 1Thes 5:4 sungah “ Sikhalsehla u le nau tla nan nih cu khawthim sung um mi nan si lo ruangah cuih ni in zaan ih fifir bang in nan rin lo lai ah lo man hlah seh” tiah a sim asi. 2peter 3: 10 ah “ Bawipa ih ni cu rinlopi ah fifir bang in a ra ding ti asi. Pathian tongkam cu thianghlim sungah Bawipa ni cu kan rin lo lai caanah a ra ding tin fiang tein in sim cia ruangah nitin kan nunah thianghlim nak nun kan nei cia ringring a tul asi.
U le nau pawl Bawipa ni ziang tik asi ding ti hi thei cia kan duh men ding. A sinan Bawipa ratsal nak ding ni cu zohman in an thei lo. Curuangah ralring te ih um cia ringring a tul nak asi. Thaisun ah Bawipa a ttum thlang ding tin thei cia sehla tuisun ah ziangmi si na tuah ding. Kan ral pawl hnenah ngaithiam kan va dil ding maw? Kan leiba pawl kan va sam ding maw? Kan thi zik te lawngah piangthar kan tum theu a bang. Dam nak cahnak kan ngah lai, san a cem hrih lo ding. Ka duh mi ka tuah hrih ding tin mi tampi kan ti theu.
Thihnak timi hi kan rin lo lai ah a ra thei mi asi. Kan nunnak hi kan mah ta si lo. Hih thil um daan hi ruah tikah kan nih minung pawl hi kan thi ding ti cu kan thei. A sinan a caan te kha cu kan thei lo. Kan Bawipa Zesuh a ra sal ding ti hi zum tu kan zaten kan thei cio. A sinan a tikcuu caan ngaingai hi kan thei lo asi. Kan Bawipa Zesuh rat ding tikcu caan, a ni le thla thaten thei sehla ziangtin kan um pei. Nangmah hi a tun ah kum15 hrawng si bang aw lah. Na thih ding ni cu tun lo kum 60 lai nung lai ding thei cia awlah leitlun ah ziangtin nun na tum.
Cule thaisun tiang lawnglawng nung ding ti bang sehla tui sunah ziangtin na nung ding. U le nau pawl Bawipa Pathian in kan hrangah thiltha hlir in tuah sak asi. A duhdawt mi a fale hrang ahcun a tha bik in khua a khang a si. Minung kan si vekin Pathian ih in duhdawt daan zia hi kan thei thiam theu lo. Leitlun ah nunnuam deuh ih kan um a si le Pathian hnenah kan lungawi, Lungawi thu kan sim, Inntha, lotha kan nei tikah Pathian thluasuah kan co kan tiih vok kan that, sia le caw kan that ih rawl ei khawm nak kan tuah. A sinan harsatnak kan tawng caan ahcun Pathian hnen ah lungawi thu kan sim theu lo.
Leitlun kan nun nak ah Nu le pa in nun in sim tikah, in sim lai ahcun kan thinnheng men thei. A sinan nunsim tu kan nei tiin kan lungawi theu ko lo maw? Hebru 12: 5 in kan siar asi le ka fapa Bawipa in nun a lo sim tikah, ziang siar lo in um hlah aw. A lo kawk tikah na thanau hlah. Ziangahtile Bawipa in a duhdawt mi cu nun a sim ih fapa ih a lak mi cu a hrem theu asi. Harsatnak cu nan pa ih pek mi nunsim nak a si tiin tuar hram uh. Ziangahtile harsat nak nan ton mi hin Pathian in a fate ah a lo ruat asi ti a lang ter asi. A pa in nun a sim lo mi fapa a um dah keel maw? U le nau pawl kan runsim duh mi cu harnak kan tawng tikah hin a cuih har nak cu satan in hmanrua ah a rak hmang ih Pathian kan tlansan ngah theu asi. Cuih caanah Bawipa a ra tlung asi ahcun hnen um fel lo din hmun ah kan um asi.
U le nau pawl Bawipa Zesuh rat caan asilole kan thih ding caan hi thaten thei cia lo in kan um ruangah nitin ten ralring cia ih um ding kha asi. 2Peter 3:12 sungah “ Pathian ni nan hngak rero lai ahhin napi in zuam uh” a ti asi. U le nau pawl zuam uh ti men si lo ih napin in ti asi. Curuangah Bawipa a ra tlung hlan ah napin in hnenum hna cu thazet in tuan kan zuam cio pei.
A ngaitu nan zaten Bawipa in lo thluasuah cio hai hram seh. A men.
