August 23,2025
Mithianghlim Rose cu thlang America ih a hmaisabik mithianghlim ih khaisan mi a si. Amah cu Kum 1586 ah Piru ram Lima khua ah a rak suak. A biang sen zet ruangah a nu in amah cu Rose (hninsi) tiah hmin a rak pek. Fala thianghlim nun ih tiamkam nak a lak theh hnuah a nu le pai pasal nei dingih an forhfial nak cu a rak el. Amah a dil tu pawl kha a hnen ihsi tlang dingah a mawi zet mi a hmai le a nonal zet mi a kut zung pawl kha hnakphek thawn a rot theu. A kum 20 ah Rose cu Mithianghlim Dominic ih a pathum nak a si mi a thianghlim mi kaing ah a rak lut. Cu theh ihsi thok in a inn ih um mi hmuan fate sung ih thlam te pakhat sungah sup nak nungram kha a rak tuah. A nih cu sual sawm nak phun kim tampi pawl kha zumnak le thinsau nak thawn a rak do. Nikhat ah Pathian in “A tum zet mi farah harsat nak theh in lungawi nak a ra. Curuangah thinglamtah um lo in zovek minung khal vancung ih kai nak lamzin an hmu lo ding” tin a rak sim.
Cui tongkam kha a theih tikah a tum zet mi thlarau lam thazaang pakhat in amah kha zin lai ah feh in “Ho… minung pawl ngai uh. Kan harsat nak pawl kha kan tuar ngah lo le lungawi nak kha ngah a theih lo” tin a ringzet mi aw in sim dingah a rak forhfial. A thih nak ding ni mal te duh ah a nih in “Pathian Bawipa ka harsat nak pawl kha thang ter hram aw. Cui harsat nak pawl in na duhdawtnak kha ka thinlung sungah karh ter hram aw” tin a rak ti. Anih cu Kum 1617 ah Kum 31 ah a nun nak a rak cem in thlang America kilkhawi tuah an rak nem hnget a si.
