136. Thiang Thlarau ka zum, timi cu ziang ti can a si?
Thiang Thlarau ka zum a si, timi cu Bawithumkom ih a pathumnak a si mi Pa le Fapa hnen in a ra mi Thiang Thlarau cu Pa le Fapa thawn biak mi le thangṭhat mi a si timi langter le zumnak phuannak a si. Thiang Thlarau cu nuntharnak kan neih theinak dingah kan thinlung sungah thlah a si (Galati 4:6).
137. Ziangruangah Fapa le Thiang Thlarau ih hnaṭuannak cu ṭhen a theih lo?
Mit ih hmuh thei lo mi Thumkom Pathian sungah Fapa le Thlarau cu an dang aw nan ṭhen theih an si lo. Caan thok ihsin caancem tiang in Pathian in a Fapa a thlah tikah a Thlarau khal a thlah cih ve ih kan zumnak sungah Khrih thawn hmunkhat ah in kom. Curuangah Pathian khal “Pa” tiah kan ko thei a si (cf. Romans 8:15). Thlarau cu mit in kan hmu thei lo a si. Asinan Ṭongkam cu kan hnenih a phuan tikah le Pawlpi sungih a cangvaih tikah Thlarau cu a maih cangvaihnak in kan thei thei a si.
138. Thiang Thlarau ih hmin pawl cu ziang so an si?
“Thiang Thlarau” timi cu Thumkom Pathian lak ih a pathumnak ih hmin a si. Jesuh in Paraclete (Consoler or Advocate) bawmtu tiin le thudik le thuhman ih Thlarau tiah a ko. Baibal thar khal in Khrih ih Thlarau, Bawi ih Thlarau, Pathian ih Thlarau, Thangṭhat sunlawihnak ih Thlarau, Tiamkam miih Thlarau tiah Thlarau khihhmuh in a sim.
139. Ziangruangah Thiang Thlarau ih ai ah hminsinnak pawl hman a si ṭheu?
Thiang Thlarau hmin sinnak tampi a um. Cu pawl tla cu:
(1) Tihnimnak a ngah tu pawl ih ti halnak daireh tertu le Khrih ih hnak ihsin a suak mi “nunnak ti dai”;
(2) Christmas Thapeknak ih sacrament hmin sinnak a si mi thianghlim hriak “culhnak”;
(3) A dai ngahtu pohpoh a thleng aw ter theitu “meisa”;
(4) Pathian ih sunlawinak langternak hmun “khawdur”;
(5) Thiang Thlarau pek tik ih hman mi “kut suannak”; le
(6) Khrih tihnimnak a ngah lai ih a parih a ṭum mi “laileng” tla an si.
140. Thlarau in profet pawl hnen ihsin a ṭong a si, kan timi cu ziang ti can a si?
“Profet pawl” timi ṭongfang ih ti can cu Thiang Thlarau ih theih ter mi an si ih Pathian ih hmin in thu than tu an si. Thlarau in Baibal hlun ih thuthang pawl a than. Cuih a thuk mi thuthang pawl cu Khrih ah a kim ih Baibal thuthang thar ah Jesuh in a phuang a si.
141. Thiang Thlarau in Tihnim petu Johan hnenah ziang a famkim ter?
Thlarau in Baibal hlun ih netabik profet a simi Tihminnak petu Johan cu a famkim ter a si. Thlarau ih lamhruainak le fialnak thawn Johan cu Pathian ih hrangah mipi pawl a timtuah (cf. Lk 1:17). Johan cu Pathian ih Fapa Khrih ih ratnak ding thu thangṭha simtu a si. (cf. Johan 1:33).
142. Mary hnenih Thlarau ih hnanṭuan mi cu ziang a si?
Khrih ih ratnak ding thuthawn pehpar aw ih Baibal hlun sungih ngan mi pawl cu Thiang Thlarau in Mary hnenah a famkim ter. A hleice in Thlarau in Mary cu Pathian ih Fapa hring dingah zaangfahnak thawn a khat terih a thianhlimnak khal man a nei ter a si. Thlarau in Mary cu Pawlpi ih lu a si mi Jesuh ih nu ah a cang ter. Pentecost ni ah Mary cu a dungthluntu hleihnih thawn an um.
143. Jesuh Khrih cu leithlun ih thuthangṭha a sim lai ah Thlarau thawn ziang vek in pehtlaih awknak an nei?
Thlarau ih hriakculhnak thawn Pathian ih Fapa cu minung cannak a lak thok ihsin Runtupa si dingah hlancia a si. Khrih Jesuh in Thlarau cu a thu zirhnak in a phuang; Pupa hnenih kam mi thu pawl a famkim ter; Pawlpi ih hnenah Pawlpi a suah caan ah, thihnak ihsin a thawhsal hnu, a dungthluntu pawl a sem tikah Thlarau a pek a si.
144. Pentecost ni ah ziang mangbangza a cang?
A thawhsal hnu, ni sawmnga ah, Pentecost ni ah thawm huham thawn a khat mi Jesuh Khrih in Thlarau a thlah ih Thianghlim Thumkom theih fiangthei a sinak dingah, cuih Thlarau cu Pathian a si tiah a sim. Khrih ih hnaṭuannak le Thlarau ih hnaṭuannak cu Pawlpi ih hnaṭuan ah a rungcang.
145. Pawlpi sungah Thlarau in ziang a tuah?
Thlarau in Pawlpi a tuah; nunnak a pek ih a thianghlim ter. Thlarau cu duhdawtnak ih Thlarau a si vek in tihnimnak a ngah zo tu pawl hnenah sualnak ruangih a hlo mi Pathian thawi bangawknak cu a co ter sal ih Khrih sungah a nung ter sal hai. Thlarau in Khrih ih thudik phuang dingah a thlah hai ih mah vek an hnaṭuan ṭuan cio dingah a bawm hai (cf. Galati 5:22).
146. Khrih le a Thlarau in ziang vek in zumtu pawlih thinlung sungah hna an ṭuan?
Khrih in a Thlarau le Pathian ih zaangfahnak cu Pawlpi hnenah sacrament pawl in pehthlaihnak a tuah ringring. Curuangah Pawlpi in Thlarau ih nuntharnak ih rah le ṭhatnak a ngah. Thianghlim Thlarau cu thlacamnak ih bawi nu a si.
