132. Jesuh cu vancungah a kai a si timi ih ti can cu ziangzo a si?
Jesuh in ni sawmli sung amah le amah a dungtluntu pawl hnenih a lang awk hnuah vancungah a kai ih a Pa ih vorhlam ah a to. Khrih cu Bawi a si ih kan hrangah cat lo bang loin a Pa thawn peh zom aw dingin in bawm ringring. A Thlarau cu kan hnenah a thlah ih a remcia mi hmun nuam thleng dingin rinnak in pe a si.
“Mithi le Minung Pawl Thuṭhen Dingin a Ra Ding”
133. Bawi Jesuh in ziangtin in uk?
Lei le van ih Bawi, a Pawlpi uktu, a si vekin Bawi Jesuh cu leitlun ah a huham le cahnak thawn mangbangza in a um ringring a si. Caan a cem tikah sunlawinak thawn leitlun ah a ra sal ding. Asinan, ziang tikah a ra sal ding, ticu zohman in kan thei lo. Curuangah cat lo bang loin Jesuh ih rat sal ding cu kan hngak a si.
134. Ziang vek in Bawipa cu thawm huham thawn leithlun ah a ra sal ding?
Leilungpi ih tik cu le caan a cem tikah thawm huham thawn Khrih ih ratnak caan a thleng ding a si. Cutikah Pathian in nehnak a co dingih ni netabik thu ṭhennak caan a thleng ding. Cun Pahian ih uknak ram cu a thleng ding a si.
135. Khrih in ziangvek in mithi le minung pawl thu a ṭhen ding?
Khrih cu leithlun rundamtu le rundamnak pe tu a si vek in thawm huham thawn thu a ṭhen ding a si. Thinlung sungih thuthup pawl siseh Pathian le minung hmai ih kan tuah le kan ṭuan mi pawl siseh a lang ter thluh ding. Zokhal in a tuah mi le a ṭuan mi vek cekci in laksawng a co ding. Cuvek ṭhiamṭhiam in a tuah sual mi a um a si le a tuah vek cekci in cawhkuan pek a si ding. Hibangtuk in Khrih ih famkimnak cu a thleng dingih Pathian khal kan ziangkim ah a cang ding a si (cf. Efesa 4:13; 1 Korin 15:28).
