A fiak mi lamzin a hril tu Pathian ih hnatuan dingin hmundang ihsin mi tinkim kha mangbang za ti dan pawl thawn a sawm asi. Ziang vek kawh nak hril khal le rinum ten zuam ih feh kha a thupi mi sawn asi. A dang lam mi cu leitlun ah mi hminthang si nak ihsin a thleng aw tu kha mi tamsawn ih theih paih mi asi.
Curuangah Hollywood ih mintami (lemcang thiam) nunram ihsin Catholic Sister a cangtu thu khal mi theih paih mi asi.
Dolores Hart cu mi hminthang America Mintami pakhat asi. Elvis Presly thawn an zuk mi flim 1957 kum ah a suak. Kum mal te a rei tikah mi hminthang si nak le a pumcawm awk nak kha tanta in Benedictine Sister a tinkiang ( Congregation) ah a lut ih thu a thencat thu a rak tar lang. Phundang ih kan sim si le a nih cu mitam lemcangtu pawlih zawh lo mi The narrow gate a fiak mi lamzin Thinglamtah zin le a mai hminthang ding hnak in Pathian ih hmin thangthat ding kha a hril sawn.
Ziangruangah hi vek in a thleng awk?
A mah cu Mithianghlim Francis Assisi ih rualpi Mithianghlim Clare of Assisi dinhmun in lem a cang ih vedio an zuk rero lai ah Mithianghlim si duh nak thinlung kha a nasa tuk tin asim. Taktak ahcun Christian zaten Parami (ziaza) lam ih cawn tlak si ding in Baptism kan lak laiah Mithianghlim pakhat ciar ih hmin kan la asi. Cule Mintami (lemcanthian) asi lai ih Movie thu Pope Paul thawn hmuhtonawk nak an nei ih an rel lai ah Pope in Nang cu St. Clare of Assisi na si tin a rak ti. A thinlung zaten in mangbanglangnak in a khat. Curuangah ngamhuai zet in hivek lamzin fiak ah Pathian hrangah tin a hril nak asi thei.
A mah vek tuisun ah Pathian hrang ah tin tumtah in ziang mi that nak pawl kan tuah ding. Christian tin in a fiak mi lamzin ihsin lut in a thianghlim mi dan thlun ding in Jesuh Khrih in in sawm asi.
A fiak mi lamzin ihsin lut uh. Ziangahtile siat nak a thlen tu lamzin cu thlun ding a ol tuk ih lamzin khal a kau ruangah cu mi lamzin ihsin a lut tu pawl cu an tam. A sinan kumkhua nunnak a thlen ter tu lamzin cu a har sa ih sangka khal a fiak ruangah cui lamzin a zawh tu an mal. (Mt 7:13-14)
Kan nih khal nitin nun ah kan ton mi harsatnak thinglamtah pawl kha Pathian ih thluasuah thawn kaih ter in um thiam ding zuam uhsi.
