Mithianghlim Eusebius cu Vercelli khua ih bishop a si. Kum 283  Italy ram Sardinia khua ah a rak suak. A pa cu kawhhran hrang ah a nun nak a pek hnu ah a nu in Rome khua ah a hruai. A thuk mi bible lam ih Degree sang a ngah hnu ah Italy sak lam Vercelli khua ah tuanvo an pek. Cui khua ah AD 340 ah Bishop ah a cang. Mithianghlim Eusebius cu puithian pawl thawn a um tlang tu hmaisa bik Bishop a si. An nih cu Pathian lam ah a zuam nak pawl kha a tha bik in a rak ap.

Kum 354 kum ah Milan khua ih an tuah mi kawhhran upa pawl ton awk nak puai ah a nih cu St. Athanasius kha Arianism ih (Bawipa Jesuh cu Pathian thawn an si nak an bang awk lo thu Pathian cu sersiam tu a si ih a dang sersiam mi thil pawl ai in upat sunlawih tlak a si thu sim nak) Arianism ih dodal nak in ngam huai zet in a rak humhim. Curuangah Emperor Constantius in a mah kha Palestine le Egypt ram ah a dawi. Zin tluan nak a kor tlek thluh tiang in an dir ih a phunphun in an hrem ko nan Catholic zum nak kha ziangtik hman ah a thlah dah lo.

Kum 361 kum ah Constantius a thih hnu ah a nih cu a suak nak khua ah kir nak caan tha a ngah sal. Bercelli khua a tlun nak lam tluan ah mithianghlim Eusebius cu nasa zet ih Pathian thu a sim nak in zin sual a thleng tu pawl kha an zum nak a hnget ter sal. A nih cu Kum 371 ah a nun nak a rak cem.